"کوویډ-۱۹ ناروغۍ د ګوزڼ پر وړاندې مبارزه ټکنۍ کړې"

په افغانستان کې روغتیايي چارواکي وایي، چې دغه هېواد کې په روان زیږدیز کال کې د ګوزڼ "پولیو" ۱۴ مثبتې پېښې ثبت شوې دي.

سږکال د ګوزڼ ثبت شوې پېښې د نورو کلونو پرتله یوازې تر سویلي ولایتونو پورې را لنډې نه دي، بلکې د دغه هېواد په شمالي او لویدیځو ولایتونو کې هم ثبت شوې دي.

په روان ۲۰۲۰ کال کې د ګوزڼ ۳ پېښې په کندهار کې، دوه یې په هلمند کې، یوه یوه په زابل، کوڼر، لغمان، فراه ، نیمروز، هرات، بدخشان او بلخ کې ثبت شوې دي.

د روغتیا وزارت د ګوزڼ د له منځه وړلو پروګرام د عامه اړیکو مشر میرجان راسخ بي بي سي ته وویل، چې له تېرو درېیو میاشتو راهیسې د ګوزڼ ضد کمپاینونه نه دي شوي.

د ښاغلي راسخ په خبره د کوویډ-۱۹ ناروغۍ له کبله د لګېدلو بندیزونو او د دغه ناروغۍ د خپرېدو د مخنیوي په موخه د دوی پروګرام ځنډېدلی خو تمه ښيي، چې جولای میاشت کې به بېرته پیل شي .

نوموړی وایي، دوی هرکال په ټول افغانستان کې د ګوزڼ ضد واکسین لس کمپاینونه پلي کوي، چې د ده په خبره سږکال یې یوازې دوه کمپاینه ترسره کړي دي .

ښاغلی میرجان راسخ وایي، دوی د پولیو وېروس د هېواد په یوې ځانګړې جغرافیه کې کلابند او محوه کولو ته یې نژدې شوي وو.

د نوموړي اشاره د افغانستان سویلي ولایتونو ته وه، چې تېرکال د ۲۶ مثبتو پېښو څخه ۱۹یې په کندهار، ارزګان او هلمند کې وه .

د روغتیا وزارت وایي، د کورونا وېروس له کبله لګېدلو بندیزونو او د دوی د پروګرام ځنډېدل د دې لامل شوو، چې سږکال دغه ویروس یو ځل بیا د هېواد هغه سیمو ته ولېږدول شي، چې هلته یې پېښې صفر ته را ټیټې شوې وې.

د روغتیا وزارت د ګوزڼ د له منځه وړلو پروګرام د عامه اړیکو مشر میرجان راسخ وویل، چې جولای میاشت کې به یو ځل بیا د ګوزڼ ضد کمپاینونه پیلوي او د هغه لپاره یې سره له اوس چمتوالي پیل کړي دي.

په تېرو څلورو کلونو کې تر ټولو زیاتې پېښې په ۲۰۱۹ کال کې ۲۶ د ګوزڼ پېښې ثبت شوي، په ۲۰۱۸ کال کې ۲۱، په ۲۰۱۷ او ۲۰۱۶ کې یوازې ۱۳- ۱۳ پېښې ثبت شوې وې.

له ۲۰۰۱ کال څخه تر ۲۰۱۹ کال پورې ګوزڼ په افغانستان کې۳۹۴ تنه کوچنیان د تل لپاره معیوبه کړي، چې تر ټولو زیاتې پېښې په ۲۰۱۱ کې اتیا او تر ټولو لږې پېښې په ۲۰۰۴ کال کې یوازې ۴ پېښې وې.