مایک پومپیو دوحه کې د بین الافغاني ناستې په اړه خوښي ښودلې
د امریکا د بهرنیو چارو وزیر مایک پومپیو په دوحه کې د افغان حکومتي چارواکو، طالبانو، سیاسي مشرانو او مدني فعالانو ترمنځ د سولې لپاره د روانو خبرو په اړه خوښي څرګنده کړې ده.
د طالبانو د استازو او له کابله دوحې ته د ورغلې پلاوې ترمنځ دوه ورځنۍ بین الافغاني غونډه نن یکشنبه د جولای پر اوومه نېټه د جرمني او قطر په ګډ کوربتوب پیل شوه.
ښاغلي پومپیو دې دې ناستې په تړاو پر خپله ټوېټر پاڼه لیکلي، د خوښۍ ځای دی چې د افغان حکومت او مدني ټولنې استازي او افغان ښځې او همدا راز د طالبانو استازي پر یوه مېز سره راټول شوي دي.
نوموړي لیکلي، دا ډول یوې ناستې ته له ډېرې مودې راهیسې انتظار کېده.
دغه ناسته او په اړه یې د مایک پومپیو څرګندونې پر داسې ورځ شوې دي چې وسله والو طالبانو په غزني کې د ملي امنیت پر یوه مرکز برید وکړ.
د چارواکو په وینا په دې برید کې د ۲ ماشومانو په ګډون ۱۲ کسان وژل شوي دي او ۱۷۹ ټپیان دي. خو طالبان وایي د برید هدف د ملي امنیت ادارې مرکز و.
د عکس سرچینه، Getty Images
کابله دوحې ته په ورغلي پلاوي کې د ښځو په ګډون لسګونه کسان شامل دي خو د طالبانو له اړخه په دې خبرو کې یوه ۱۷ کسیزه ډله ګډون کوي.
د جرمني او قطر په کوربتوب جوړې شوې دې ناستې کې د پخوانۍ هوکړې له مخې د ګډونوالو برخه اخیسته شخصي او انفرادي بڼه لري.
د قطر چارواکو د غونډې ګډونوالو ته د ښه راغلاست ترڅنګ وویل چې دا ناسته په نړیواله کچه څارل کېږي او ډېره تمه ترې کېږي خو په وینا یې دا ناسته به د دوی له تمې سره سم پایله ولري.
د عکس سرچینه، Getty Images
دغه راز د افغانستان او پاکستان له پاره د جرمني استازي مارکس پوټزیل هم د بین الافغاني غونډې ګډنوال ته ویل چې دا یو ښه فرصت دی چې د افغانستان د راتلوونکې په هکله په کې خبرې وشي.
د دې ناستې ګډونوال هیله من دي چې په افغانستان کې د سولې او ټیکاو له راوستو سره به دا بین الافغاني غونډه مرسته وکړي.
د افغانستان د مالي پخواني وزیر حضرت عمر زاخیلوال چې په دې غونډه کې حضور لري بي بي سي ته وویل هیله من دی چې دا ناسته د افغان حکومت او طالبانو ترمنځ د سولې خبرو ته لاره هواره کړي.
د همدې بین الافغاني غونډې د جوړېدو له امله له طالبانو سره د امریکايي چارواکو د سولې اووم پړاو خبرې چې د اوو ورځو راهیسې تر پرون ماښام پورې روانې وې ځنډول شوي دي او د جولای په نهمه به له سره پیلېږي.
امریکایانو او طالبانو تر دې دمخه په خبرو کې د پرمختګ خبره کړې او وايي چې له خبرو راضي دي.
د افغانستان سولې له پاره د امریکا ځانګړي استازي زلمي خلیلزاد ویلي، د خبرو په اوسني پړاو کې د بل هر وخت پرتله ډېر پرمختګ شوی دی.
ښاغلي خلیلزاد په یوه ټویټر پیغام کې ویلي، د تېرو څو ورځو خبرو کې د سولې هوکړې پر ټولو څلورو اړخونو، له ترهګرۍ سره مبارزه، د بهرنیو پوځیانو وتل، په بین الافغاني خبرو کې ګډون او د تل پاتې هر اړخیز اوربند په ګډون موضوعاتو کې خورا پام وړ پرمختګ شوی دی.
نوموړی زیاتوي، 'د بین الافغاني خبرو په خاطر د امریکايي استازو او طالبانو تر منځ خبرې دوې ورځې ځنډېدلې، ' خو په وینا یې 'یوې هوکړې ته د رسېدو په هدف لا هم ډېر کار پاتې دي او د همدې له پاره به د جولای پر نهمه نېټه دغه خبرې پیل شي. '
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
دغه راز په د قطر کې د طالبانو د دفتر ویاند سهیل شاهین هم پر خپل ټویټر پاڼه لیکلي چې له امریکايي استازو سره د خبرو له پرمختګ نه راضي دي او د دوی او امریکايي استازو ترمنځ به خبرې د جولای په نهمه بیا پیل شي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
په همدې مهال ښاغلی خلیلزاد تر دې دمه په خبرو کې د شوي پرمختګ په اړه له ولسمشر محمد اشرف غني سره هم تیلېفوني خبرې کړې دي.
