کابل: د اداري اصلاحاتو کمېسیون پر موټر برید کې مرګژوبله اوښتې

په کابل کې د د اداري اصلاحاتو د کمېسیون ویاند عبدالفرید احمد بي بي سي ته وویل چې د دوي د همکارانو پر کاسټر ډوله موټر چاودنه کې د دغه کمېسیون کارکوونکو ته مرګژوبله اوښتې ده.

پېښه د دارالامان سیمه کې شوې ده.

ښاغلی احمد وايي پر دغه موټر هغه مهال چاودنه وشوه چې مامورین یې خپلو کورونو ته رسول.

د افغانستان د عامې روغتیا وزارت ویاند وحید مایار پر خپله ټوېټر پاڼه په نننۍ چاودنه کې د ۵ کسانو د وژل کېدو او د ۱۰ نورو د ټپیانېدو خبر ورکړی دی.

د کورنیو چارو وزارت وايي دغه چاودنه شاوخوا یوه نېمه بجه د یوه نښلېدونکي یا چسپکي ماین په وسیله شوې.

تېره ورځ هم کابل د څلورو چاودنو شاهد و چې دوه یې نښلېدونکي ماینونه ول. یوې چاودنې د برهان الدین رباني د پوهنتون محصلین په نښه کړل او بله د ټاکنو د خپلواک کمېسیون پر موټر وشوه.

د تېرې ورځې په چاودنو کې دوه کسان وژل شوي ول او ۲۷ نور ژوبلېدلي ول. په ټپیانو کې پنځه ښځینه محصلینې هم وې.

هاخوا د افغانستان د کورنیو چارو وزارت وایي د کوچني اختر لپاره په ټول هېواد کې امنیتي ځواکونه د تیارسئ په حال کې دي.

د دغه وزارت ویاند نصرت رحیمي وايي د اختر لپاره ځانګړي امنیتي تدابیر نیول شوي. د هغه په وینا، پولیس به د اختر پر لومړۍ ورځ په جوماتونو کې تلاشي کوي او ځینې به د ملکي خلکو په جامو کې په جوماتونو کې ځای پر ځای شي.

ښاغلی رحيمي زیاتوي پولیسو ته دنده ورکړل شوې هغه کسان ونیسي چې د اختر په ورځو کې پټاکۍ کاروي او تر اوسه یې ۸۰ هغه دوکانداران هم نیولي چې پر ماشومانو یې دغه چاودنېدونکي پټاکۍ خرڅې کړي دي.

په وروستیو اونیو کې په افغانستان کې په جوماتونو کې چادونې وشوې او پر دیني عالمانو هم هدفي بریدونه ترسره شول، چې د دوو دیني عالمانو تر څنګ یې ګڼو کسانو ته مرګ ژوبله واړوله.

د افغانستان کورنیو چارو وزارت په وینا د روژې په میاشت کې د بېلا بېلو امنیتي پېښو له امله څه باندې ۲۰۰ پولیس او نژدې ۲۰۰ ملکي کسان وژل شوي دي او طالب لوري ته هم د خپل ځان پرتله د څو برابره درانې مرګ ژوبلې اړولو خبره کوي.