د بي بي سي د فقید خبریال عبدالصمد روحاني په نوم جایزه
د عکس سرچینه، AFP/Getty Images
په افغانستان کې د خبریالانو ملاتړ یوه بنسټ د بي بي سي د فقید خبریال عبدالصمد روحاني په نوم یوه جایزه ټاکلې ده.
د 'کابل پرس کلب' تصمیم لري هر کال د رسنیو ازادي په ورځ دوو تنو خبریالانو ته چې د جګړې له لومړۍ کرښې راپورونه ورکوي دا جایزه ورکړي.
د دې بنسټ مشر عزیز تسل په دې اړه بي بي سي ته وویل:
''موږ سږ کال په هلمند کې د بي بي سي د فقید خبریال عبدالصمد روحاني په نوم ایوارډ جوړ کړی. کابل پریس کلب دا جایزه د افغانستان ځینو هغو خبریالانو ته ورکوي، چې هره ورځ د جګړې له کرښې رپوټونه چمتو کوي.''
سږکال دغه جایزه د ازادۍ راډیو خبریال الیاس داعي او د طلوع نیوز خبریال کریم امیني ترلاسه کړه.
عبدالصمد روحاني په ۲۰۰۵ کال کې له بي بي سي سره همکاري پیل کړه او له خپل ټاټوبي هلمند ولایته یې راپورونه ورکول.
د عکس سرچینه، Aziz Tassal
روحاني په ۲۰۰۸ کال کې وتښتول شو او مړی یې د لښکرګاه ښار بهر وموندل شو. عبدالصمد روحاني د وژل کېدو پرمهال ۲۵ کاله عمر درلود او درې کاله یې د بي بي سي پښتو او دري څانګو لپاره کار وکړ.
له عبدالصمد روحاني دوې مېرمنې او یوه لور پاتې دي.
کابل پرس کلب بله جایزه د اریانا خصوصي ټلویزیون د فقید خبریال نعمت الله زهیر په نوم نومولې چې سږ کال یې دوو تنو افغان خبریالانو ته ورکړه.
