هند کې افغان محصل په ۳۷ هېوادونو کې لومړی شوی

يوه افغان محصل د هند په یوه پوهنتون کې د ۳۷ هېوادونو زده کړیالانو ترمنځ د سرو زرو مډال ګټلی.

دغه زده کړیال محمد حلیم دیدار نومېږي چې د هندوستان په جامعه همدرد پوهنتون کې يې د کمپیوټر ساینس په برخه کې تازه د ماسټري په کچه زده کړې بشپړې کړې دي.

ښاغلي دیدار د خپل پوهنتون په کچه د تر ټولو لوړو نومرو په اخيستلو سره دغه مډال ګټلی.

ده په ۲۰۱۵ کال کې د لیسانس په برخه کې هم ورته جایزه خپله کړې وه.

هند کې افغان محصل طلايي مډال ګټلی

د افغانستان د لوړو زده کړو وزارت ویاند فیصل امین دا د افغانانو لپاره یوه لویه لاسته راوړنه بولي.

دغه ځوان اوس په اسپانیا کې د دوکتورا لپاره بورس هم ترلاسه کړی دی.

همدرد پوهنتون د هند حکومتي پوهنتون دی چې د نړۍ شاوخوا ۳۷ هېوادونو محصلین پکې زده کړې کوي.

محمد حلیم دیدار بي بي سي ته وویل، هندوستان ته په شخصي لګښت د لیسانس او ماسټرۍ زده کړو لپاره تللی:

"ما لیسانس او ماسټري دواړه په شخصي لګښت بشپړ کړل."

نوموړي ته په ۲۰۱۵ کال د هند مرستیال ولسمشر محمد حامد انصاري د فراغت پرمهال طلايي مډال هم ورکړی و.

محمد حلیم دیدار په ۱۹۹۲ کال بغلان ولایت کې زیږېدلی، په همدې ولایت کې یې د خاتم الانبیاء ښوونځی لوستی او په لومړۍ نومره ترې فارغ شوی دی.

دی وايي، ماسټري یې هم په معلوماتي ټکنالوژۍ کې اخیستې ده.

دیدار وايي، اوسمهال په همدرد پوهنتون سوداګرۍ برخه کې تدریس کوي.

د هند همدرد پوهنتون کې شاوخوا ۱۷۰ افغان محصلین په لوړو زده کړو بوخت دي.