تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
له بريتانيا د يوه افغان پناه غوښتونکي د ايستلو مخنيوی وشو
د بريتانيا له کارډېفه افغانستان ته د یوه افغان ځوان د استولو مخه هغه مهال ونيول شوه کله چې یوه قاضي له الوتنې څو ساعته وړاندې دا پرېکړه وکړه.
شاوخوا ۵۶۰۰ کسانو په یوه داسې غوښتنلیک لاسليک وکړ چې افغانستان ته د ۱۹ کلن بشير نادري د استولو مخه ونيسي.
دی ۹ کاله په دغه ښار کې اوسېدلی او ټاکل شوې وه چې بېرته افغانستان ته استول شوی وای.
د بریتانیا په پارلمان کې د کارډېف د ښار استازې جو سټيونسن وویل، قاضي د ده بېرته لېږل هغه مهال ودرول کله چې دی الوتکې ته د ختو په حال کې و.
د کورنیو چارو وزارت په دې اړه تراوسه څه نه دي ویلي.
د پارلمان غړې دا هم زیاته کړه چې د بریتانیا د کډوالو وزير دا دوسیه په خپله څېړي.
خو د بشير د استولو ګواښ لا هم شته.
اغلې سټيونسن زیاته کړه چې بشير ډېره موده په لوېديځ کې تېره کړې او همدغه افغانستان کې ده ته د ګواښ لامل ګرځي.
اوس مهال د دې ځوان وکيل یوه تګلاره پیل کړه چې له مخې یی بشير وکولی شي په بریتانیا کې په دایمي توګه واوسېږي.
جو سټيونسن وايي، د کډوالو له چارواکو به دا غوښتنه هم وشي چې بشير کارډېف ښار ته نژدې د کډوالو یو مرکز ته واستول شي چې د ده ملګرې، د ملګرې کورنۍ يې او هم هغه کورنۍ چې بشير ورسره اوسېده وګوري.
نوموړې زياته کړه، زه له ټولو هغو زرګونو خلکو مننه کوم چې د بریتانیا له بېلابېلو ښارونو یې له بشير سره مرسته کړې.
د اغلې سټيونسن په وينا، بشير افغانستان هغه مهال پرېښود چې پلار یې طالبانو وواژه او مور یې د ځمکې خرڅولو ته اړ شوه تر څو قاچاق وړونکو ته پیسې برابرې کړي چې بشير بریتانیا ته واستوي.
د ده ملګرې، ۲۴ کلنه نيکول کووپر په دې باور ده، چې د کورنیو چارو وزارت بشير بېرته استوي ځکه چې دی اوس نور ماشوم نه دی.
دا د کورنیو چارو له وزیره دا غوښتنه کوي چې د بشير دوسیې ته دې بیا کتنه وکړي.
