بلوچستان کې د پاکستان پوځ چورلکه لادرکه شوې؛ د کوټې کور کمانډر په ګډون مهم کسان پکې سپاره وو

د پاکستان پوځ د عامه اړيکو څانګې (ای اېس پي ار) تائيد کړې چې بلوچستان کې د پوځ يوه چورلکه چې مهم پوځيان په کې سپاره وو لادرکه شوې ده.

د پاکستان پوځ وايي په دغه چورلکه کې د ۱۲ قول اردو د قومندان په ګډون شپږ تنه سپاره وو چې اوس يې د پلټنې عمليات روان دي.

ويل کېږي د کوټې کور کمانډر بلوچستان کې له سېلاب ځپلو سره د مرستې له چارو کتنه کوله چې کراچۍ ته د بېرته ستنېدو پر مهال لادرکه شوه.

د بلوچستان ایالت په ګڼو سیمو کې د تېرو څو ورځو بارانونو او ورپسې د سېلابونو له کبله لږ تر لږه ۱۳۶ کسان وژل شوي او ګڼ شمېر ټپیان دي.

د ایالتي چارواکو په وینا یوازې په تېرو ۲۴ ساعتونو کې ۹ کسان وژل شوي او ترڅنګ یې خلکو ته درانه مالي زیانونه هم اوښتي دي.

د بلوچستان اعلی وزير مير عبدالقدوس بزنجو له چارواکو او پوليسو غوښتي چې د ژغورنې عمليات کې پوره مرسته وکړي.

د بلوچستان د پوليسو مشر پرويز عمراني ويلي، د پوليسو ټيمونه د چورلکې د موندلو هڅې کوي خو وايي چورلکه په غرنۍ سيمه کې لادرکه شوې چې د لټون بهير یې له ستونزو سره مخ کړی دی.

عمراني وايي، له تېرو پنځو ساعتونو راهيسې د پوليسو او پوځ له خوا د ژروغونې ګډ عمليات روان دي.

د پاکستان لومړي وزير شهباز شريف پر ټوېټر پاڼه د پوځي چورلکې د لادرکه کېدو له امله خواشيني څرګنده کړې ده.