تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
یوناما کندوز کې د ولسي مرګ ژوبلې ادعاوې څېړي
په افغانستان کې د ملګرو ملتونو مرستندوی ماموریت یوناما ویلي، چې د کندز په بز کندهاري سیمه کې د ۳۲ ملکیانو د وژلو ادعاوې څېړي
یوناما په خپله خبرپاڼه کې وايي، د لومړنیو رپوټونو له مخې د لړم پر ۱۳ د وسلوالو په ضد د نړېوالو ځواکونو په هوایي بریدونو کې تر ۳۲ ولسی وګړي وژل شوي او تر ۱۹ پورې نور ټپیان شوي دي.
د افغانستان لپاره د ملګرو ملتونو ځانګړي استازي تادامیچي یاماموتو ویلي: "ولسي مرګ ژوبله د سولې او ارامۍ لپاره هڅې زیانمنوي."
نوموړي ټینګار کړی: " نړیوال ځواکونه باید په هوایي بریدونو کې د ولسي مرګ ژوبلې د لا ډېر کمولو لپاره اړین ګامونه پورته کړي او د هوايي بریدونو بشپړ تحلیل ولري."
یوناما له چارواکو غوښتي چې د دغې ملکي مرګ ژوبلې چټکې، بې پلوه او خپلواکې څیړنې ته ژر تر ژره لار هواره او د پیښې د زیان د جبران، قربانیانو ته د ځواب ورکونې او په راتلونکې کې د داسې بریدونو د مخنیوي هڅې وکړي.
له دې وړاندې د دفاع وزارت ویاند دولت وزیري ویلي و چې د کندز ښار په بزکندهاري (سیمه) کې د طالبانو د لوړپوړو غړو یوه غونډه په نښه شوې ده.
د هغه په خبره، په غونډه کې د طالبانو هغه قومندانان هم وو چې د کندز په ناامنیو کې یې لاس درلود. افغان ځواکونو په لومړیو کې پر هغوی ځمکنی برید وکړ خو وروسته یې له نړیوالو ځواکونو د هوايي عملیاتو مرسته وغوښته.
د نوموړي په خبره، په دې برید کې د کندوز لپاره د طالبانو د نظامي کمېسون د مشر ملا ضیا الرحمان متقي په ګډون د دې ډلې اوه مهم قومندانان وژل شوي دي.
دولت وزیري په دغه برید کې د ولسي وګړو مرګ ژوبله رد نه کړه، خو ویې ویل، طالبانو دا ولسي خلک "د انساني سپر" په توګه کارولي.
په افغانستان کې د نړیوالو ځواکونو عمومي قومندان جنرال جان نیکولسن هم په کندز کې د دوی د ځواکونو هوایي بریدونه منلي او پر ولسي مرګ ژوبله یې خواشیني څرګنده کړې.
