"کندوز کې د ملکي وگړو مرگ ژوبله ډېره خواشينونکې ده."

واشنگټن پوست:

امريکايۍ ورځپاڼې واشنگټن پوست په کندز کې د افغان ملکي وگړو د مرگ ژوبلې وروستۍ پېښې ته کتنه کړې، او وايي امريکايي ځواکونو منلې چې په طالب ضد هوايي بريدونو کې افغان ملکي وگړو ته مرگ ژوبله اوښتې.

ورځپاڼې په افغانستان کې د بهرنيو ځواکونو د قومندان جنرال نيکولسن وينا را اخيستې چې وايي "د ملکي وگړو مرگ ژوبله چې په هر راز شرايطو کې رامنځته شوې ډېره خواشينونکې ده."

ورځپاڼې د پېښې په تړاو د بشري حقونو د مدافع ډلو او د پخواني افغان ولسمشر حامد کرزي په گډون د ځينو افغان سياستوالو او مشرانو نيوکو ته هم اشاره کړې.

افغان مشرانو ويلي دغه راز پېښې د طالبانو په وړاندې مبارزه کمزورې کوي.

ډان:

پاکستان چاپ ډان ورځپاڼې د "شربت گله به نه شړل کېږي" تر سرليک لاندې خپاره کړي يوه مطلب کې ليکلي:

د خيبر پښتونخوا لوړ پوړى چارواکى شوکت يوسفزى وايي، د پښتونخوا د کورونيو چارو وزارت له پاکستان د شربت گلې د ايستلو له پرېکړې لاس په سر شوى.

* د "افغانستان مونالیزا" خوشي کولو ډیپلوماتیکې هڅې

د ورځپاڼې په وينا په دغه ايالت کې د "تحريک انصاف" واکمن گوند مشر عمران خان هم له سر وزير پرويز خټک نه غوښتي و چې شربت گلې ته دې له پاکستانه د وتلو لارښوونه نه کوي.

ښاغلي يوسفزي ويلي دا پرېکړه د بشرپالنې او له افغانستان سره د ښه نيت په بنسټ شوې ده.

ډيلي ټلېگراف:

بريتانيا چاپ ډيلي ټلېگراف ورځپاڼې په موصل کې د اسلامي دولت نومې ډلې په وړاندې روانې جگړې ته کتنه کړې.

ورځپاڼه وايي، کله چې په موصل جگړه پاى ومومي نو بيا به د عراق راتلونکې لپاره اصلي جگړه پيل شي.

د ورځپاڼې په وينا په دې جگړه کې د کردي پېشمرگه ځواکونو او عراقي پوځ ترمنځ همکارۍ د پام وړ دي.

د موصل جگړې د کوردي سياستوالو او بغداد ترمنځ سړې اړيکې هم تودې کړې خو دغه نږدېوالى او جوړجاړى اوس هم په نازک حالت کې دى.

* عراقي پوځ د موصل نیولو لپاره بیا عملیات پیل کړل

ورځپاڼه وايي، پېشمرگه ځواکونو موصل ته د نه ورننوتو ژمنه کړې او په بدل کې به بغداد د کوردي سيمو د حد او بريد درناوى کوي.

دوى دواړو سره هوکړه کړې چې د کرکوک سيمې د تيلو عوايد به سره نيمايي کوي چې کردان دغو پيسو ته د خپلو حکومتي چارو پر مخ بيولو لپاره ډېره اړتيا لري.

د ورځپاڼې په باور، دا حالت د کردستان د خپلواکۍ په لور چې کردان سخت ورته ليواله دي ښه گام نه دى.

خو د تيلو د بيو زياتېدا پورې دا غوښتنه کردانو لپاره په دويمه درجه لومړيتوب بدل شوى.