MV Isle of Islay le CMAL

Chaidh a' chiad tè de cheithir bàtaichean-aiseig ùra a tha gan togail san Tuirc, an MV Isle of Islay, a thoirt seachad do CMAL.

Tha dùil a-niste gum fàg i an Tuirc an ath-sheachdain, 's gun toir i cola-deug Alba a ruighinn.

Feumaidh Caledonian Mac a' Bhriuthainn an uair sin criuthaichean a dhèanamh eòlach oirre, agus deuchainnean cala a dhèanamh leatha.

Mar sin dheth tha dùil rithe ann an seirbheis as t-earrach.

Bidh an soitheach, a ghabhas 450 luchd-siubhail agus 100 càr no 14 làraidh, a' seòladh air slighean Ìle is Diùra.

Chaidh cuirm a chumail aig gàrradh Cemre ann an Yavlova san Tuirc airson a toirt seachad gu foirmeil do CMAL - a' bhuidheann riaghaltais leis a bheil bàtaichean-aiseig ChalMac.

Bha dùil an toiseach gun deadh a toirt seachad san Dàmhair 2024, ach thàinig maill an dèidh maille air sin, agus cion luchd-obrach is stuthan togail gan coireachadh.

Bha CMAL air innse san t-Samhain gun robh iad an dòchas gun gabhadh iad sealbh air an MV Isle of Islay ron Nollaig, ach gur e "dùbhlan" a bhiodh ann.

Tha dùil gun tèid an dàrna soitheach ùr airson slighean Ìle, an MV Loch Indaal, a thoirt seachad an ceann sia mìosan eile, agus obair a' leantainn air dhà eile a bhios air slighean Loch nam Madadh agus an Tairbeirt.