Ceist mhòr an tèid pròiseact Ionad Hiort ann an Ùig air adhart

Tha na dùbhlain a thaobh na bhiodh a dhìth orra de mhaoineachadh a' fàgail gu bheil teagamh ann an tèid Ionad Hiort a bha san amharc ann an Ùig ann an Leòdhas air adhart idir.

Tha cosgais a' phròiseict air èirigh gu mòr sna 17 bliadhna on chaidh làrach ann am Mangurstadh a thaghadh airson ionad-taisbeanaidh mu eachdraidh Hiort a thogail.

"Nuair a thòisich sinn bha sinn ag obair aig £6m," mhìnich cathraiche Ionad Hiort, Iain Bochanan.

Cha mhòr nach eil cosgaisean air a dhol an-àirde a dhà uimhir agus bhiodh timcheall air £12m fhathast a dhìth airson am pròiseact a thoirt gu buil.

Tha cead-planaidh aca ach "'s e an aon rud a tha a dhìth oirnn an t-airgead", tha Mgr Bochanan ag ràdh.

Tha na h-uimhir de dh'airgead phoblach air a ghealltainn dhaibh ach tha e ag ràdh gum feum iad fhèin suas ri £6m a thogail.

A chùm sin, tha làrach-lìn, taobh a-muigh ùr aca airson an ìomhaigh air na meadhanan-sòisealta a thogail agus "airson 's gum bi barrachd fios aig daoine mu dheidhinn a' phròiseict againn".

Ach chan eil e idir cinnteach gun dèan iad a' chùis.

Thuirt Mgr Bochanan: "Tha e garbh duilich an-dràsta feuchainn ri airgead a thogail agus mar a tha cùisean san t-saoghal chan eil e càil nas fhasa, tha e nas duilghe na bha e idir.

"Tha e gu math duilich do sgìre bheag mar seo agus ag obair air pàirt-ùine gu saor-thoileach."

Tha e ag ràdh gu bheil na beagan mhìosan romhainn gu bhith fìor chudromach agus nach eil e idir cinnteach gun soirbhich leotha.

"Mura faigh sinn air an t-airgead a chur ri chèile ro dheireadh na bliadhna agus mura bi fios againn le cinnt gu bheil sinn a' dol a dh'fhaighinn pàirt den airgead co-dhiù, 's iongantach leamsa gun tachair e," thuirt e.

Tha Hiort, mu 41 mìle far Leòdhais sa Chuan Shiar, air a dhìon mar Làrach Dualchais na Cruinne.

Dh'fhalbh na h-eileanaich mu dheireadh ann an 1930 agus chan eil ach luchd-obrach agus saor-thoilich Urras Nàiseanta na h-Alba a' fuireach ann airson beagan mhìosan, cho math ri luchd-saidheins agus cùmhnantaichean MoD a tha an urra ri reudar airson deuchainnean rocaidean.

Bha na h-uimhir de chonnspaid ann nuair a shoirbhich le tagradh Ùige airson Ionad Hiort a stèidheachadh.

Bha beachd ann gun robh ceanglaichean eachdraidheil nas làidire le Uibhist a Tuath agus na Hearadh a bha cuideachd san fharpais agus a tha air na planaichean aca fhèin a thoirt air adhart bhon uair sin.