Bha Hiort gu h-eachdraidheil mar phàirt de pharaiste na Hearadh

Chaidh moladh comataidh ris a bheil a' chùis an urra a chur chun na Làn-chomhairle, gur e Mangurstadh an t-àite a b'fheàrr a-mach à trì àiteachan a bha ga iarraidh.

'S ann mar phàirt de pharaiste na Hearadh a bha Hiort gu h-eachdraidheil, agus bha tagradh a-staigh às an Òb, a bharrachd air fear eile às Uibhist, leis a bheil ceangal làidir ri Hiort san là an-diugh, ri linn an airm.

'S ann air cho coltach 's a thathas a' cumail a-mach gu bheil àrainneachd Mhangurstaidh ri Hiort, a chaidh tagradh a' bhaile sin a stèidheachadh.

Bhòt comhairlichean 17-14 oidhche Ardaoin an aghaidh moladh gum bu chòir sùil as ùr a thoirt air a' chùis, an dèidh molaidh bho chomhairliche Hearach airson ath-sgrùdaidh.

Ach thuirt luchd-iomairt anns na Hearadh gun lean an strì airson ath-sgrùdaidh, agus iad a' cumail a-mach nach robh a' chiad sgrùdadh cothromach.

Thèid buidheann ùr a chur air chois airson am pròiseact a thoirt air adhart.