Dòchas gum faigh Uibhist peatral air ais Dimàirt ach ceistean a' leantainn
- Air fhoillseachadh
Tha mì-thoileachas ann gun deach Uibhist fhàgail gun pheatral, ged a tha dòchas ann gun ruig connadh an t-eilean Dimàirt.
Tha na stèiseanan connaidh ann an Uibhist agus Beinn na Faoghla uile air ruith a-mach à peatral anns na làithean mu dheireadh.
Tha e coltach gu bheil fhathast dìosal agus ola gu leòr aca.
Thathar an dùil a-nise ri làraidh le peatral a thig à Steòrnabhagh feasgar Dimàirt, ged a bhios sin a rèir na h-aimsire.
Thuirt a' chompanaidh ola Certas gur e droch shìde as coireach airson nan trioblaidean ann an Uibhist.
A' bruidhinn air Aithris na Maidne Dimàirt ge-tà, thuirt fear de chomhairlichean Uibhist a Tuath, Ùisdean Robasdan, gu bheil ceistean ann mu dheidhinn mar a chaidh an gnothach a làimhsicheachadh
Thuirt e gu bheil tòrr dhaoine air dragh a thogail leis mu dheidhinn.
"Bha e caran tàmailteach nach robh fhios againn gun robh an duilgheadas seo ann na uair.
"Feasgar Dihaoine a chuala mi mu dheidhinn seo nuair a dh'fhòn cuideigin a ràdh gum biodh iad a' ruith a-mach Diluain.
"Mar a thachair ruith iad a-mach Disathairne, is an uairsin dh'fheuch sinn ri greim fhaighinn air buidheann èiginn nan Eilean Siar ann an Steòrnabhagh 'son an rud a ghluasad air adhart."
Thuirt an Comh Robasdan gun robh cothroman air a bhith aig Certas anns na làithean mu dheireadh connadh fhaighinn a dh'Uibhist, is gun robh iad air a bhith "gu math slaodach" is gun robh "gu leòr leisgeulan" air a bhith aca.
"Feumaidh sinn dèanamh cinnteach nach tachair an leithid a-rithist," thuirt e.
Rinn an Comh Robasdan moladh mòr air CalMac ge-tà, 'son mar a tha iadsan air cuideachadh le connadh fhaighinn a dh'Uibhist.
Dh'innis e cuideachd gu bheil e a' tuigsinn gu bheil cuid de na stèiseanan ann an Uibhist air peatral a chumail gu aon taobh air eagal is gum biodh suidheachadh èiginn ann.
A thuilleadh air sin, thuirt e gu bheil carbadan nan seirbheisean èiginn a' ruith air dìosal.
Ann am brath, thuirt Certas: "Dh'fhàg droch aimsir nach b'urrainn dhan tancair againn ceangal aig Loch a' Chàrnain, is tha gaoth làidir cuideachd air aiseagan eadar na h-eileanan a chur dheth is air dàil a chur air làraidhean connaidh.
"Tha sinn ag obair le buidhnean eile gus dèanamh cinnteach gum faigh connadh troimhe nas fhaide den t-seachdain is gun till cùisean chun na h-àbhaist cho luath 's a ghabhas."
