Airgead 'son Ionad Hiort

Fhuair pròiseact Ionad Hiort an Ùig an Leòdhas taic-airgid faisg air £1m bho Riaghaltas na h-Alba.

Tha an t-airgead a' tighinn bho mhaoin a tha ag amas air piseach a thoirt air eaconomaidhean ionadail às dèidh a' phandemic.

Ged a tha còrr is deich bliadhna ann bho shoirbhich le plana gus an t-ionad a stèidheachadh ann an Ùig - is tagraidhean ann à Uibhist is às na Hearadh ann cuideachd - tha duilgheadasan air a bhith ann airgead a thogail.

Nas tràithe am-bliadhna, dh'aidich an fheadhainn a tha air cùl a' phlana gun robh ceist mu choinneimh na pròiseict às dèidh mar a dh'fhailich orra taic fhaighinn bho stòras eile aig Riaghaltas na h-Alba.

Tha iad ag ràdh gur e ceum mòr air adhart a tha san airgead seo a-nise.

"'S e naidheachd air leth a tha seo dha Ionad Hiort agus gu dearbh dha Sgìre Ùige", thuirt cathraiche Ionad Hiort, Iain Bochanan.

"Cha robh dùil againn ri seo agus tha sinn, tha mi a' creidsinn, ann an shock fhathast mu dheidhinn a h-uile càil a th' ann.

"Feumaidh sinn suidhe sìos còmhla ri oifigearan aig a' Chomhairle is HIE airson dèanamh a-mach dè an ath-cheum a tha sinn a' dol a thoirt", thuirt e.

Fhuair pròiseactan eileanach eile taic bho Mhaoin an Riaghaltais cuideachd.

Tha Cnoc Soilleir aig Ceòlas Uibhist a' faighinn £750,000 'son an dàrna ìre den phròiseact aca-san.

Ann an Earra-Ghàidheal, tha £565,000 a' dol a Thiriodh 'son hub coimhearsnachd a stèidheachadh.

Thèid £285,000 a Chearrara 'son hub na coimhearsnachd an sin, is £600,000 'son pròiseact gus goireasan a' chalaidh a leasachadh ann an Caolas Ulbha.