Tòiseachadh ùr do Bhanca Bìdh na Gàidhealtachd
- Air fhoillseachadh
Chaidh Banca Bìdh na Gàidhealtachd a ghabhail thairis leis a' bhuidhinn New Start Highland.
Bha am banca bìdh, a bheir taic do chòrr air 5,000 duine gach bliadhna, roimhe ga ruith le Blythswood Care airson 20 bliadhna.
Chan atharraich mar a tha an goireas ga ruith, no na h-uairean fosglaidh.
'S e sgioba bheag de luchd-obrach pàighte agus còrr is 70 duine saor-thoileach a tha ga ruith, eadar Inbhir Nis, Inbhir Narann, Alanais, Baile Dhubhthaich agus Inbhir Pheofharain, ann an co-bhann le Urras Trussell.
Teaghlaichean òga a' cur feum air bancaichean bìdhe
- Air fhoillseachadh21 An Giblean 2022
"An dèidh dhuinn comharrachadh 25 bliadhna de fhrithealadh na coimhearsnachd againn, tha sinn air a bhith a' coimhead ri dòighean ùra anns an toir sinn buaidh nas fharsainne," thuirt Àrd-Stiùiriche New Start Highland, James Dunbar.
"Tha e a' faireachdainn mar cheum nàdarra dhuinn a bhith a' gabhail thairis Banca Bìdh na Gàidhealtachd, 's e gu math coltach ris na seirbheisean a bheir sinn seachad mar thà do dhaoine a th' ann an èiginn."
Thuirt e gun obraich a' bhuidheann còmhla ris an sgioba aig Blythswood airson an t-atharrachadh a dhèanamh cho furasta 's a ghabhas.
Tha New Start Highland air a bhith a' cuideachadh dhaoine ann an èiginn fad còrr is 25 bliadhna
Tha New Start Highland air a bhith a' cuideachadh dhaoine gus am beatha a chur air ais air slighe fad còrr air 25 bliadhna, eadar taic taigheadais, comas-obrach, àrnais dàrna-làimh agus cothroman saor-thoileach.
"Tha soirbheachas Banca Bìdh na Gàidhealtachd thairis air an 20 bliadhna mu dheireadh na theisteanas chan e a-mhàin air an sgioba, ach dealas nan saor-thoileach agus taic làidir na coimhearsnachd," thuirt Àrd-stiùiriche Blythswood Care, Jeremy Ros.
"Tha sinn a-niste ga chur fo smachd ar co-bhuidhne carthannais New Start Highland le misneachd. Tha mòran den luchd-cleachdaidh againn air buannachd fhaighinn o na seirbheisean aca mar thà, tro thrèanadh, taigheadas agus eile, a' fàgail gu bheil am Banca Bìdh ann an làmhan sàbhailte 'son a dhol bho neart gu neart."
Tha New Start Highland a-niste a' sireadh dhaoine saor-thoileach a bharrachd airson cuideachadh leis a' Bhanca Bhìdh agus thairis air a' bhuidhinn san fharsainneachd.
