राज ठाकरेंची 'उत्तर सभा' तलवारीमुळे अडचणीत?

"येत्या 3 मेपर्यंत मशिदींवरील भोंगे उतरवले नाहीत, तर जिथं मशीद आहे तिथं हनुमान चालिसा लावू," असा इशारा मनसे अध्यक्ष राज ठाकरे यांनी दिलाय. ठाण्यात राज ठाकरेंची काल (12 एप्रिल) सभा झाली. 'उत्तर सभा' असं या सभेला नाव देण्यात आलं होतं. मात्र आता या सभेतील एका घटनेमुळे राज ठाकरे यांच्याविरोधात गुन्हा दाखल झाला आहे.

राज ठाकरे यांनी या सभेत तलवार उंचावून पुन्हा म्यान केली होती. परंतु आता भारतीय हत्यार कायद्यान्वये त्यांच्याविरोधात ठाण्यातील नौपाडा पोलीस ठाण्यात गुन्हा दाखल झाला आहे. मनसेच्या ठाणे शहराध्यक्ष रवींद्र मोरे यांनी राज ठाकरे यांचे स्वागत केले आणि ही तलवार भेट दिली होती. ही तलवार म्यानातून बाहेर काढून पुन्हा म्यान करणाऱ्या राज ठाकरेंविरोधात 104/22 कलम 425 हत्यार कायद्यान्वये गुन्हा दाखल झाला आहे. राज ठाकरे यांच्यासह अविनाश जाधव, रवींद्र मोरे यांच्याविरोधातही हा गुन्हा दाखल झाला आहे.

राज ठाकरे सभेमध्ये काय म्हणाले होते?

"तुम्हाला नमाज पढायचीय, अजान द्यायचीय, घरामध्ये द्या. शहरांचे रस्ते, फूटपाथ कशाला अडवताय? प्रार्थना तुमची आहे, आम्हाला का ऐकवताय?" असा प्रश्न विचारत राज ठाकरेंनी मशिदींवरील भोंग्यांना लक्ष्य केलं.

राज ठाकरे म्हणाले, "जे आज माझं भाषण ऐकत असतील, त्या तमाम हिंदूंना माझं सांगणं आहे, 3 तारखेपर्यंत ऐकत नसतील, तर जिथं मशीद आहे तिथं हनुमान चालिसा लागलीच पाहिजेत. एकमेकांना त्रास देणारा धर्म असू शकत नाही."

"नवरात्रोत्सव असतो, दहा दिवस आपण समजू शकतो. तरीही लाऊडस्पिकर कमीच लावला पाहिजे. काही सणवार असेल तर आपण समजू शकतो. 365 दिवस तुम्ही लाऊडस्पिकरवरून ऐकवता. कशासाठी, कुणासाठी? 3 तारखेला ईद आहे. माझी राज्य सरकारला, गृहखात्याला विनंती आहे की, कुठचीही तेढ आम्हाला निर्माण करायची नाही. महाराष्ट्राला स्वास्थ्य आम्हाला बिघडवायचं नाही. पण आज 12 तारीख आहे, 12 एप्रिल ते 3 मे महाराष्ट्रातील सर्व मौलवींना बोलवा, सर्व मशिदींवरचे लाऊडस्पिकर उतरवले पाहिजे. 3 मेनंतर तुम्हाला कुठलाही त्रास आमच्याकडून होणार नाही," असं राज ठाकरे म्हणाले.

तसंच, "मतांसाठी वाटेल त्या प्रकारे धर्म चालवणार आणि आम्ही उघड्या डोळ्यांनी बघत बसायचं. हा देशभर त्रास आहे. जे आज माझं भाषण ऐकत असतील, त्या तमाम हिंदूंना माझं सांगणं आहे, 3 तारखेपर्यंत ऐकत नसतील, तर जिथं मशीद आहे तिथं हनुमान चालिसा लागलीच पाहिजेत. एकमेकांना त्रास देणारा धर्म असू शकत नाही," असंही राज ठाकरे म्हणाले.

राज ठाकरेंच्या भाषणातील महत्त्वाचे मुद्दे -

राज ठाकरेंच्या सभेआधी मनसेने ठाण्यात लावले हिंदी भाषेत बॅनर?

या सभेआधी राज ठाकरेंचे ठाण्याच्या पाचपाखाडी भागात 'मुंबई मे बैठा हिंदुओ का राजा अपनी हिफाजत चाहिये तो मनसे आजा,' असे हिंदी भाषेमध्ये फलक लागलेले बघायला मिळतायेत.

गुढीपाडव्याच्या मनसेच्या सभेत हिंदुत्व, उत्तरप्रदेशच्या विकासाचं कौतुक यामुळे मनसेचा मराठीचा मुद्दा आता मागे पडणार का, असा प्रश्न उपस्थित होतोय.

मनसेच्या स्थापनेपासून राज ठाकरेंनी मराठी भाषा, मराठी माणसांचे हक्क इत्यादी मुद्दे अजेंड्यावर ठेवले. त्याचबरोबर 'महाराष्ट्रात राहायचं असेल तर मराठीतच बोलावं लागेल' हे मनसे अध्यक्ष राज ठाकरे यांनी वारंवार सांगितले आहे.

काही वर्षांपूर्वी फक्त मराठी प्रसारमाध्यमांना मुलाखती देणार असल्याची भूमिका राज ठाकरे यांनी घेतली होती. त्यांच्या पत्रकार परिषदांना हिंदी माध्यमांच्या प्रतिनिधींना प्रवेश नाकारण्यात आला होता. त्याचबरोबर सर्व दुकानांवर मराठी भाषेत पाट्या लावल्या पाहिजेत, यासाठी मनसे स्टाईलने 'खळ्ळखट्याक' आंदोलनही करण्यात आले होते. मग आता मनसेच्या सभांचे बॅनर हिंदी भाषेत लावण्याचे काय कारण असावे?

'हिंदीत बॅनर लावले म्हणून मराठीचा मुद्दा सोडला असं नाही...'

मनसेकडून उत्तर भारतीयांचे महाराष्ट्रात येणे, मराठी भाषेत बोलणे हे सर्व मुद्दे मनसेने सोडून दिले का?

हे प्रश्न आम्ही हे बॅनर लावणारे मनसेचे विभाग अध्यक्ष महेश कदम यांना विचारले असता ते म्हणाले, "राज ठाकरे यांनी हिंदुत्वाचा मुद्दा हाती घेतला आहे. 'मुंबई मै बैठा है हिंदुओ का राजा, अपनी हिफाजत चाहिए तो मनसे आजा!' ही वाक्यरचना राज ठाकरेंनी घेतलेल्या भूमिकेला साजेशी आहे. मी ती मराठीत करण्याचा प्रयत्न केला. पण त्याची शब्दरचना नीट होत नव्हती. ती वाचायलाही चांगली वाटत नव्हती म्हणून आम्ही हिंदीमध्ये लिहिलं."

पण मराठीत तुम्हाला हिंदुत्वावर एकही मराठी घोषणा सापडली नाही? मराठीचा मुद्दाही आता सोडून मनसे हिंदी भाषेला अधिक महत्त्व देतय का? या प्रश्नावर महेश कदम सांगतात, "मराठी भाषेचा मुद्दा हा मनसे कधीच सोडणार नाही. तोच आमचा प्रमुख मुद्दा आहे. आम्ही मराठी माणसाच्या न्याय हक्कासाठी भांडत राहणार. पण देशपातळीवर राज ठाकरे हिंदुत्वाचं नेतृत्व करावं ही सर्वांची इच्छा आहे. हिंदी ही आपली राष्ट्रभाषा आहे. त्यामुळे हिंदीत बॅनर लावले म्हणून मराठीचा मुद्दा सोडला असं नाही."

मनसेला फटका बसू शकतो?

हिंदूत्वासाठी हिंदी भाषेचा आधार घेणं गरजेचं आहे का? या भूमिकेमुळे मनसेला कितपत फायदा होईल किंवा तोटा सहन करावा लागेल? याबाबत बोलताना जेष्ठ पत्रकार रवींद्र आंबेकर सांगतात, "मनसेची वाटचाल शिवसेनेच्या पावलावर पाऊल ठेवून होत आहे. जी 'पोकळी' बाळासाहेब ठाकरेंनी भरली होती. ती 'पोकळी' आता मनसे घेऊ पाहतेय. मराठीच्या मुद्द्यावरून हिंदुत्वाच्या मुद्द्यावर जाताना बाळासाहेबांनाही हिंदीचा आधार घ्यावा लागला होता. पण तेव्हाची परिस्थिती वेगळी होती."

"शिवसेना-भाजप मित्रपक्ष होते. त्यावेळी शिवसेनेची भूमिका भाजपविरोधी नव्हती. पण मनसेकडून ज्या भूमिका मांडल्या गेल्या, त्या सोईनुसार बदलल्या गेल्या. त्यामुळे मनसेला धोका निर्माण होऊ शकतो. 80 टक्के हिंदू प्राबल्य असलेल्या देशात अनेक हिंदुत्ववादी पक्षांची तशी स्पेस आहे. मात्र आता भाजपा 'हार्डकोअर' हिंदुत्वाच्या रणनितीवर आहे, शिवसेनेची भूमिका थोडी मवाळ झालेली दिसतेय, पण त्यांनी हिंदूत्व सोडलं नाही. त्यामुळे मनसे हिंदूत्वाचा मुद्द्यावर लक्ष केंद्रित करत असेल तर त्याचा मर्यादित स्वरूपात फायदा मनसेला होईल. पण यातून जर मराठी माणसाचे मूळ मुद्दे बाजूला ठेवतं असेल तर याचा फटका पक्षाला पडू शकतो," असंही रवींद्र आंबेकर म्हणाले.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)