विधानसभा निवडणूक 2019: देवेंद्र फडणवीस हेच पुन्हा मुख्यमंत्री होणार - अमित शाह

भारतीय जनता पार्टीचे अध्यक्ष आणि गृहमंत्री अमित शाह यांनी देवेंद्र फडणवीसच महाराष्ट्राचे मुख्यमंत्री होतील अशी घोषणा केली.

काहीही झालं तरी महाराष्ट्रात भाजपा युती आणि हरयाणामध्ये भाजपा तीन-चतुर्थांश मतांनी विजयी होतील अशी खात्रीही त्यांनी आपल्या भाषणातून व्यक्त केली. मुंबईत ते 'कलम 370: एक मंथन' या विषयावर बोलत होते. या भाषणामध्ये अमित शाह यांनी देवेंद्र फडणवीस यांचं कौतुकही केलं. फडणवीस यांच्या नेतृत्वाखालील सरकारनं शेती, शिक्षण अशा क्षेत्रांमध्ये मोठी प्रगती केली असंही ते म्हणाले.

ते पुढे म्हणाले, "'एक देश में दो विधान, दो प्रधान, दो निशान नहीं चलेगा' या श्यामाप्रसाद मुखर्जींच्या घोषणेनुसारच आम्ही वाटचाल करत आहोत. त्यामुळेच आम्ही नवे सरकार स्थापन झाल्यावर पहिल्याच महिन्यात कलम 370 रद्द करण्याचा निर्णय घेतला. आमच्या तीन पिढ्यांनी हे कलम रद्द करण्यासाठी प्रयत्न केले. असं असतानाही विरोधी पक्षांना या निर्णयात राजकारण दिसत आहे."

'पं. नेहरूंच्या चुकीमुळे पाकव्याप्त काश्मीरचा प्रश्न'

"काश्मीरचा प्रश्न सरदार पटेल यांच्या हातामध्ये नव्हता. सरदार पटेल यांनी इतर सर्व संस्थाने विलिन करून घेतली. मात्र काश्मीरचे प्रकरण तेव्हाचे पंतप्रधान जवाहरलाल नेहरू यांच्याकडे होता. ते मात्र विलीन होऊ शकलं नव्हतं.

"पाकिस्तानच्या सैन्याला भारतीय फौजांनी मागे ढकलत नेलं होतं. परंतु अचानक हा प्रश्न युनोमध्ये नेण्याचा निर्णय घेतला. त्यानंतर युद्धविरामाचा निर्णय घेतला गेला. त्यामुळेच पाकव्याप्त काश्मीर आपल्या ताब्यात आजवर आलं नाही. पाकव्याप्त काश्मीरचा प्रश्न पं. जवाहरलाल नेहरू यांच्या चुकीमुळेच उद्भवला आहे," अशा शब्दांमध्ये अमित शाह यांनी पं. नेहरू आणि काँग्रेसच्या सरकारवर टीका केली.

ते पुढे म्हणाले, "कलम 370 हटवल्यामुळे काश्मीरचा फायदा झाला आहे. तेथे दहशतवाद संपून जाईल. तिथल्या अनुसुचित जाती-जमातींच्या लोकांना आरक्षणाचा फायदा होईल. तिथली सफरचंदं देशभरात जातील. अॅट्रोसिटीविरोधी कायदा लागू होईल. सफाई कर्मचारी आयोग, मानवाधिकार आयोग कायदा काश्मीरमध्ये लागू होईल. बालविवाहविरोध कायदा लागू झाल्यामुळे तेथिल मुलींचं संरक्षण करेल. काश्मीरमधील दिव्यांग बंधूंनाही मदत होणार आहे. तीन कुटुंबांनी या राज्यात भ्रष्टाचारविरोधी कोणताही कायदा केला नव्हता तेथे अॅंटी करप्शन ब्युरोही नव्हता. आता भ्रष्टाचारी लोकांना काश्मीरच्या थंडीतही घाम फुटायला सुरुवात झाली आहे. महाराष्ट्रात कलम ३७० नसूनही इथली भाषा, संस्कृती सुखरूप आहे. तसंच इतर राज्यातही आहे. परंतु काश्मीरमध्ये संस्कृतीचं कारण पुढे करून कलम 370 कायम ठेवले होते. "

1971 साली बांगलादेश युद्ध भारतानं जिंकलं तेव्हा भाजपाचे नेते अटलबिहारी वाजपेयी यांनी तत्कालीन पंतप्रधान इंदिरा गांधी यांचं अभिनंदन केलं होतं. 1994 साली काश्मीर भारताचा अविभाज्य भाग आहे हे सांगण्यासाठी वाजपेयी युनोमध्ये गेले होते. देशहिताच्या प्रत्येक बाबतीत भाजपनं विरोधी पक्षात असूनही सरकारच्या मागे उभं राहाण्याचा निर्णय घेतला होता. मात्र राहुल गांधी यांनी देशहिताच्या मुद्द्यावर भाजप सरकारमागे राहिले नाहीत. राहुल गांधी यांनी कलम 370 हटविण्याला विरोध केला, सर्जिकल स्ट्राईकच्यावेळेसही ते देशहिताच्या बाजूने नव्हते अशा शब्दांमध्ये अमित शाह यांनी राहुल गांधी यांच्यावर टीका केली.

अमित शाह यांची सोलापूर सभा

अमित शाह यांची याआधी सोलापुरात सभा झाली होती.

"काँग्रेस - राष्ट्रवादी लोकशाही मूल्यं मानत नाहीत. ते घराणेशाही मानतात," असं वक्तव्य गृहमंत्री अमित शहा यांनी सोलापुरात केलं आहे. "जर भाजपने आपला दरवाजा पूर्ण उघडा ठेवला तर शरदराव राष्ट्रवादीत कुणीच शिल्लक राहणार नाही," असं शहा म्हणाले.

त्यांच्या उपस्थितीत सोलापुरात आज काही नेत्यांनी भाजपमध्ये प्रवेश केला. अमित शहा यांच्याबरोबर मुख्यमंत्री देवेंद्र फडणवीस, भाजपचे प्रदेशाध्यक्ष चंद्रकांत पाटील, सोलापूरचे खासदार जयसिद्धेवर स्वामी उपस्थित होते.

धनंजय महाडिक, जयकुमार गोरे, राणा जगजितसिंह पाटील यांनी भाजपमध्ये प्रवेश घेतला.

दरम्यान, मुख्यमंत्री देवेंद्र फडणवीस महाजनादेश यात्रेचा दुसरा टप्पा आज समारोप झाला आहे.

अमित शहा यांच्या सोलापूरच्या भाषणातील मुद्दे -

मुख्यमंत्री देवेंद्र फडणवीस यांच्या भाषणातले प्रमुख मुद्दे - 

चंद्रकांत पाटील यांच्या भाषणातले मुद्दे

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)