कोल्हापूर उत्तरमधून मधुरिमाराजेंची 'नाईलाजा'ने माघार, शाहू छत्रपती म्हणाले, 'माघार म्हणजे पुढच्या लढाईची तयारी'

कोल्हापूर उत्तर मतदारसंघातून काँग्रेसच्या उमेदवार मधुरिमाराजे छत्रपती यांनी माघार घेतली आहे.

कोल्हापूरचे काँग्रेसचे खासदार शाहूमहाराज छत्रपती यांनी माध्यमांना याबाबत सांगितलं की, नाईलाजाने मधुरिमाराजेंना माघार घ्यावी लागतेय.

ते पुढे म्हणाले की, "राजेश लाटकर काँग्रेसचे निष्ठावंत कार्यकर्ते आहेत. त्यांनी माघार घेतली नाही, म्हणून मधुरिमाराजेंनी माघार घेतली. कारण अशा परिस्थितीत निवडणूक लढवायची नाही, असं आम्ही ठरवलं."

माघार घेतली तरी पुढच्या लढाईची तयारी करतोच आपण, असंही शाहूमहाराज छत्रपती म्हणाले.

काँग्रेसनं इथून आधी राजेश लाटकर यांना उमेदवारी जाहीर केली होती. मात्र, नंतरच्या यादीत लाटकरांची उमेदवारी रद्द करून, खासदार शाहूमहाराज छत्रपती यांच्या सून मधुरिमाराजे छत्रपती यांना उमेदवारी दिली. मात्र, लाटकरांनी अर्ज मागे घेण्याच्या शेवटच्या दिवसापर्यंत आपला अर्ज मागे घेतला नाही.

आता राजेश लाटकरांना काँग्रेस पाठिंबा देतं का, हे पाहणं महत्त्वाचं ठरेल.

काँग्रेसचे विधानसभेसाठीचे उमेदवार

महाराष्ट्र विधानसभा निवडणुकीसंबंधी बातम्यांसाठी येथे क्लिक करा

सचिन सावंतांचा लढण्यास नकार

काँग्रेसच्या तिसऱ्या यादीत काँग्रेसचे मुंबईतील नेते सचिन सावंत यांचं नाव होतं.

सचिन सावंत यांना अंधेरी पश्चिम मतदारसंघातून उमेदवारी जाहीर करण्यात आली होती. पण अंधेरी पश्चिममधून उमेदवारी दिल्याबद्दल सचिन सावंतांनी जाहीर नाराजी व्यक्त केली होती.

सचिन सावंत यांना वांद्रे पूर्व मतदारसंघातून उमेदवारी हवी होती. पण तो मतदारसंघ महाविकास आघाडीच्या जागावाटपात शिवसेना उद्धव ठाकरे गटाला सुटली. तिथून शिवसेनेनं वरूण सरदेसाई यांना उतरवलं आहे. त्यामुळे सचिन सावंत यांना अंधेरी पश्चिममधून उमेदवारी जाहीर करण्यात आली होती.

पण सचिन सावंत यांनी एक्स (पूर्वीचं ट्विटर) वर पोस्ट करत उमेदवारी नाकारली होती.

पहिल्या यादीत होती दिग्गजांची नावं

या यादीत काँग्रेस विधिमंडळ नेते बाळासाहेब थोरात यांच्याही नावाचा समावेश आहे. याशिवाय लातूरमधून विलासराव देशमुख यांचे दोन्ही मुलं धिरज विलासराव देशमुख आणि अमित विलासराव देशमुख यांनाही तिकीट देण्यात आलं आहे.

माजी मुख्यमंत्री पृथ्वीराज चव्हाण यांना दक्षिण कराडमधून उमेदवारी देण्यात आली आहे. पलूस-काडेगावमधून डॉ. विश्वजीत पतंगराव कदम काँग्रेसचे उमेदवार असतील.

विरोधी पक्ष नेते विजय वडेट्टीवार यांना ब्रम्हपुरीतून उमेदवारी दिली आहे. तर CWC सदस्य व प्रदेश कार्याध्यक्ष नसीम खान यांना चांदिवली मतदारसंघातून उमेदवारी देण्यात आली आहे.

कसबा पेठेतून रवींद्र धंगेकरांना उमेदवारी देण्यात आली आहे. भोर मतदारसंघातून संग्राम थोपटे यांना उमेदवारी देण्यात आली आहे. धारावी मतदारसंघातून वर्षा गायकवाड यांची बहीण ज्योती गायकवाड यांना उमेदवारी देण्यात आली आहे.

(बीबीसीसाठी कलेक्टिव्ह न्यूजरूमचे प्रकाशन)