Сүрөт баян: Борис Жонсон ким?

8 июль 2022

Дээрлик үч жыл мурун Консервативдик партияны жеңишке жеткирген Борис Джонсон партиянын төрагалыгын тапшырды. Жонсон анын ордуна жаңы премьер-министр шайланганга чейин өз кызматында калат. Биз анын буга чейинки баш айланткан ийгилиги менен азыркы абалын сүрөттөр менен баяндап беребиз.

Eton College — Сүрөттүн түшүндүрмөсү, Борис Жонсон 1964-жылдын 19-июнунда Нью-Йоркто төрөлгөн, саясатчы бала кезинде үй-бүлөсү менен далай көчүп конгон. Ал Eton College’ге барган.

Оксфорд — Сүрөттүн түшүндүрмөсү, Ал Оксфорд университетине билим алып, Оксфорд бирикмесинин президенти болгон. Ошондой биринчи аялы Аллегра Мостин-Оуэн менен ушул окуу жайда таанышкан. Алар 1993-жылы эки башка жолго түшкөн.

Борис Жонсон журналист — Сүрөттүн түшүндүрмөсү, Ал эмгек жолун журналист катары баштаган. Ал Daily Telegraph’та иштеп, акыры Spectator журналынын редактору болгон.

"Менде сага жаңылык бар" — Сүрөттүн түшүндүрмөсү, Жаркыраган каарман - ал Би-Би-Синин "Менде сага жаңылык бар" (“Have I Got News for You”) программасына катышкан. Сүрөт теле алып баруучу Ульрика Жонссон аны бийлегенди үйрөтүп жатканда тартылган.

Борис Жонсон — Сүрөттүн түшүндүрмөсү, Саясий амбициялары 2001-жылы Хенлиден консервативдик депутат болуп шайланууга жеткирген.

Борис Жонсон кайыкта — Сүрөттүн түшүндүрмөсү, Анын кийинген стили көбүнчө салттуу эмес болчу. Жонсон 2003-жылы Save The Children уюмун колдоо үчүн кайыкта Темза дарыясына сүзүп барган.

Жонсон футбол — Сүрөттүн түшүндүрмөсү, Ал анын алдындагы ар нерсеге өзүн таштоо менен белгилүү болгон - сүрөттө Жонсон Редингдеги Мадейски стадионунда өткөн кайрымдуулук футбол матчында немис жарым коргоочусу Маурицио Гаудинону “регби-подкат” кылган учуру.

Лондондун мэри — Сүрөттүн түшүндүрмөсү, 2008-жылы ал консерваторлордон Лондондун мэрлигине талапкер болгон.

Мэр шайлоосу — Сүрөттүн түшүндүрмөсү, Ал жеңишке жеткен. Бул сүрөттө Консервативдик партиянын ошол кездеги лидери Дэвид Кэмерон аны шайлоодогу жеңиши менен куттуктап жатат.

Жонсон аялы менен — Сүрөттүн түшүндүрмөсү, Ал кезде Жонсон адвокат Марина Уилер менен баш кошкон болчу. Алар төрт балалуу болуп, 2020-жылы ажырашкан.

Лондондогу Олимпиада — Сүрөттүн түшүндүрмөсү, Лондон 2012-жылы Олимпиаданы өткөрүүгө укук алганы сүрөткө түшүүгө көбүрөөк мүмкүнчүлүк берди.

Жонсон Жапонияда — Сүрөттүн түшүндүрмөсү, Ал Жапонияга соода маселелери боюнча жасаган сапарында регби ойноп жатып, 10 жаштагы баланы жөөлөп, жыккан.

Велосипедчи Жонсон — Сүрөттүн түшүндүрмөсү, Вело сүйүүчү катары ал мэр болуп турган кезинде Лондондо коомдук велосипедди ижарага алуу схемасы жана велосипед супермагистралдары киргизилген.

Премьер-министри Дэвид Кэмерон менен — Сүрөттүн түшүндүрмөсү, Жонсон-мырза улуттук саясатка кайтып келди - ал 2015-жылдагы шайлоодо премьер-министр Дэвид Кэмерондун жетекчилигинин астында парламентте бир орунга ээ болгон, бирок 2016-жылга чейин Лондондун мэри кызматында калды.

Референдум — Сүрөттүн түшүндүрмөсү, Ал 2016-жылы ЕБдан чыгуу жөнүндө референдум өткөндө Майкл Гове менен Улуу Британиянын биримдиктен чыгуусуна үгүттөп, көпчүлүктүн көңүл чордонуна түшкөн.

Брэксит — Сүрөттүн түшүндүрмөсү, Референдумда “чыгып кетүү” эң көп добуш алды.

Жонсон ТИМ башчысы — Сүрөттүн түшүндүрмөсү, Эртеси күнү Кэмерон-мырза премьер-министрлик кызматтан кетти, бирок Жонсон анын мураскору болбой турганын жарыялап, күтүүлөрдү "чаташтырды".

Жонсон ТИМ башчысы — Сүрөттүн түшүндүрмөсү, Тереза Мэй премьер-министр болуп, Жонсон-мырза тышкы иштер министри болуп дайындалды.

Жонсон Мьянмада — Сүрөттүн түшүндүрмөсү, Тышкы иштер министри катары Жонсон-мырза көп жерлерди кыдырган. 2017-жылы Мьянмада тартылган сүрөт. Кийинки жылы ал Мэй-айымдын Brexit (Британиянын ЕБдан чыгуу) келишимине нааразы болуп, министрлер кабинетинен кеткен.

Жонсон шайлоодо — Сүрөттүн түшүндүрмөсү, Улуу Британия Евробиримдиктен кантип чыга турганы боюнча бир нече айга созулган саясий туңгуюктан кийин Мэй-айым кызматын тапшырууга аргасыз болду. Анын ордуна Жонсон-мырза келген.

Королева Елизавета менен — Сүрөттүн түшүндүрмөсү, Ал консерваторлордун жаңы лидери болуп шайлануу үчүн Жереми Хантты жеңген. Ал - 92 153 добуш алса, атаандашы 46 656 добуш топтогон. Королева ага өкмөттү түзүүнү өтүнгөн.

бокс — Сүрөттүн түшүндүрмөсү, Жонсон-мырза Brexit боюнча прогресске жетише албай калгандан кийин кайрадан шайлоо дайындаган. Шайлоо өнөктүгү учурунда ал Улуу Британия 2020-жылдын декабрына чейин Евробиримдиктен толугу менен чыга турганын айткан.

шайлоодогу жеңиш — Сүрөттүн түшүндүрмөсү, Ал бийликке бир топ көбөйгөн көпчүлүк менен кайтып келди.

Даунинг-стрит — Сүрөттүн түшүндүрмөсү, Жонсон-мырза өнөктөшү Кэрри Симондс менен Даунинг-Стрит 10го кайтып келген.

Protect the NHS — Сүрөттүн түшүндүрмөсү, 2020-жылдын январында Улуу Британия Евробиримдиктен чыгып кетти, бирок ал, башка дүйнө сыяктуу эле, Кытайдан чыккан коронавирустун жайылышына байланышкан кыйынчылыктарга туш болду.

Covid-19 чаралары — Сүрөттүн түшүндүрмөсү, Вирус катаал чараларга алып келген: адамдар үйдө калууга жана социалдык алыстыкты сактоого тийиш эле. Жонсон-мырза жана канцлер Риши Сунак саламаттык сактоо системасынын кызматкерлерине ыраазычылык билдиришип, улуттук кол чабууларга кошулган.

Жонсон коронавирус — Сүрөттүн түшүндүрмөсү, Жонсон-мырза өзү да вирусту жуктуруп алып, обочого алынган, бирок өлкөнү үйүнөн башкарып жаткан. 10 күндөн кийин анын абалы начарлап, оорукананын жандандыруу бөлүмүнө жеткирилген.

Борис Жонсон — Сүрөттүн түшүндүрмөсү, Үч жумадан кийин ал жумушуна кайтып келип, британ коомчулугунун "тайманбастыгын" мактады.

Жонсон уулдуу болду — Сүрөттүн түшүндүрмөсү, Бир нече жумадан кийин Жонсон-мырза жана анын жубайы Симондс-айым уулдуу болгондугун жарыялашты - баланын аты Уилфред Лоури Николас Жонсон коюлган. Николас деген ысым Жонсон-мырзаны ооруканада коронавирустан дарылаган эки дарыгердин урматына коюлду.

локдаун — Сүрөттүн түшүндүрмөсү, Октябрдын аягында Жонсон-мырза саламаттык сактоо системасы үчүн "медициналык жана моралдык катастрофаны" алдын алуу үчүн Англияда экинчи локдаун башталарын жарыялады. Ал ыкчам чаралар үй-бүлөлөрдү Рождество майрамында чогулта алат деген үмүтүн билдирди.

Коронавируска каршы вакцина — Сүрөттүн түшүндүрмөсү, Декабрь айында жакшы жаңылыктар болду, анткени өлкөнүн тарыхындагы эң чоң эмдөө программасы башталган. Жонсон-мырза Лондондогу ооруканага барып, вакцина алгандардын айрымдарына "бул сиз үчүн жана бүтүндөй өлкө үчүн жакшы" деп айткан.

үйлөнүү тою — Сүрөттүн түшүндүрмөсү, Жонсон-мырза 2021-жылдын май айында Уэстминстер соборунда уюштурулган жашыруун тойдо Симондс-айымга үйлөнгөн.

Дэвид Эйместин өлүмү — Сүрөттүн түшүндүрмөсү, Эссекстин Лей-он-Си шаарындагы шайлоо округунда бычакталып өлтүрүлгөн 69 жаштагы депутат сэр Дэвид Эймсстин өлүмү өлкөнү дүрбөлөңгө салды. Жонсон-мырза анын министрлер кабинетинин бир нече мүчөсү анын өлүмү тууралуу укканда көзүнө жаш алганын айтып берген.

Жонсон кыздуу болду — Сүрөттүн түшүндүрмөсү, 2021-жылдын декабрында Жонсон кыздуу болду, ымыркайга Роми ысмы ыйгарылды. Бул сүрөттө жубайлар кызы менен Чекерсте видео чалуу жасаганын көрүүгө болот.

корпоратив — Сүрөттүн түшүндүрмөсү, 2022-жылдын январында Жонсон-мырза жана анын өкмөтү локдаун учурунда өткөрүлдү делген бир нече майрамдык иш-чараларга байланыштуу талкууга түштү. Жонсонго ишенбөөчүлүк көрсөтүү боюнча жашыруун добуш берүүдө 211 депутат премьер-министрди колдоп, 148и ага каршы чыкты. Жонсондун кызматта калышы үчүн 180 добуш керек болчу.

Украинадагы согуш — Сүрөттүн түшүндүрмөсү, Орусия Украинага басып киргенден кийин Жонсон-мырза өлкөгө өз аймагын коргоого жардам берүү үчүн аскердик техника сунуштаган. Киевдин расмий өкүлдөрү кабарлашкандай, премьер-министр кызматтан кетерин жарыялагандан кийин президент Владимир Зеленский аны менен телефон аркылуу байланышкан жана украин лидери бул кабарды "өкүнүчтүү" деп атаган.

Жонсондун отставкасы — Сүрөттүн түшүндүрмөсү, Жонсон-мырза 7-июлда өкмөттүн көптөгөн отставкаларынан кийин, ошондой эле локдаун мыйзамдарын бузгандыгы үчүн айыппулга жыгылганы жана анын мурдагы жетекчи орун басары Крис Пинчерге каршы сексуалдык ыдык боюнча талаш-тартыштардан улам отставкага кете турганын жарыялады.

Борис Жонсон жаңы өкмөт башчы келгенче ишин улантат
7 июль 2022
Борис Жонсонду кызматтан кетирген беш себеп
8 июль 2022

Башкы кабарлар

Редактордун тандоосу