Gọọmentị Abia steeti etiela iwu machiri gwongworo ịgba n'okporoụzọ mgbe chi ka dị

Gọọmentị Abia steeti amachiela ụgbọala gwongworo igba n'okporoụzọ ọbụla na steeti ahụ maọbụladị n'oge e nyere ha ohere ịgba.

Kọmishọna njem na steeti ahụ bụ Godswill Nwanoruo ekwuola na ụgbọala gwongworo agaghị na-agba site n'elekere isii nke ụtụtụ ruo elekere itoolu nke abalị, iji beleta ihe mberede okporoụzọ.

Gọọmentị steeti ahụ ekwuola na gwongworo ọbụla a hụrụ na-agba na mpaghara Aba, Umuahia nakwa Ohafia na steeti ahụ ga-ata ezigbo ahụhụ dịrị ha maka ida iwu a ehibere.

Echiche ndị mmadụ bụ na iwu ọhụrụ a dapụtara maka ihe merede okporoụzọ mere n'Ogbor Hill Aba, Abia Steeti n'ụbọchị Tọzde nke kwapịasiri akụnaụba ndị mmadụ ma kpalite ọnwụ ụfọdụ ndị mmadụ.

Cheta na ihe mberede okporoụzọ a gụnyere ụgbọala gwongworo na ụgbọala obere ndị ọzọ.

Dịka Maazị Nwanoruo si kwuo gọvanọ Okezie Ikpezu bụ gọvanọ steeti ahụ hibere otu ga-elekọta nrubeisi iwu a ma kwuo na a ga-amalite mmanye ya bụ iwu bido n'ụbọchị 14 nke ọnwa Febụwarị, 2022.

O kwukwara na e mere nke a i ji belata kpachị kpachị ụzọ nke ọtụtụ ụgbọala gwongworo so akpalịte.

Ọ rutụlwara aka n'obi mgbawa so agwa ọjọọ ndị gwongworo na-akpa akụkụ ụzọ "Aba tollgate" ebe ha ji aka malite ibu ngwongwo agbanyeghi na gọọmentị enyeghi ha ikike ime nke a ebe ahụ.

Gọọmenti kwuru na otu ga-amalite mmanye iwu a ga-agụnye ngalaba nlekọta njem okporoụzọ bụ National Union of Road Transport Workers (NURTW) na ministri na-ahụ maka njem nakwa otu njem bụ Road Transport Employers Association of Nigeria (RTEAN).

Gịnị mere n'Ogbor Hill Aba nke Abia steeti?

Otu nwoke bi n'Aba a kpọrọ Obialor Ejimofor akọwaala etu o siri gbanahụ ọnwụ site n'ihe mberede okporoụzọ mere n'Ogbor Hill Aba, Abia Steeti n'ụbọchị Tọzde.

Ọ sị na nke a mere mgbe ụgbọala ukwu 'trailer' sọbara isi n'ime ahịa a na-egbu ma na-ere anụ a kpọrọ 'Ahia udele' dị na Waterside.

Ọ sị na ha nọ n'ime ọgbatumtum Keke mgbe ụgbọala ahụ si n'ugwu na-agbatu, mana ọ dịka ihe o ji akwụsị dara nke bụ 'break failure'.

"Ụgbọala ji ọsọ na-abịa ebe keke anyị nọ mana anyị hapụrụ gbaa ọsọ ma na-elezi ka ebe ụgbọala ahụ kụụrụ ụgbọala ọzọ ma sọba isi n'ime ahịa.

"Ọ malitere imebi ọtụtụ ụlọahịa dịka ọ na-agbada n'ahịa dị n'ime ndagwuru ugwu."

Ejimofor sị na o mechara nụta akụkọ na ọtụtụ ihe mebiri nakwa na o nwe ndị nwụrụ anwụ.

N'ahịa udele ebe ihe a mere bụ ahịa ọtụtụ ndị chọrọ ịzụta anụ na-ekwo ekwo.

N'ihi nke a gọvanọ Okezie Ikpeazu enyela iwu ka e mechie ahịa ahụ ma buga ya n'ebe a kpọrọ Omuma Uzor dị n'Ukwa West.

Osote ya bụ Ude Oko Chukwu gara ebe ahụ sị na e mechiri ahịa a maka ọnọdụ ọjọọ ebe ahụ dị nke na-emetụ ahụike ndị mmadụ.

Gọvanọ kelere ndị na-ere ahịa ebe ahụ maka ibuga ndị merụrụ ahụ n'ihe mberede ahụ n'ụlọọgwụ.

A mabeghi kpọmkwem mmadụ ole merụrụ ahụ maọbụ nwụrụ n'ihe okporoụzọ ahụ.

Nke a abụghị mbụ ụdị ihe mberede okporoụzọ a ga-eme n'ebe a na-akpọr Ugwu Ogbor-Hill.

Ihe mbere okporoụzọ na-emekarrị ebe ahụ opekarịa mpe otu ugboro kwa afọ ọbụla, nke na-enute ọnwụ ọtụtụ mmadụ.