Gọọmentị Abia anapụla m na ezinaụlọ m ara n'ọnụ - Otu na ndị nkuzi a chụrụ n'ọrụ

Ụfọdụ ndị nkuzi so n'ime ndị a chụrụ n'ọrụ n'Abia Steetị akwaala arịrị etu e si napụ ha ara n'ọnụ n'otu ntabi anya.

Otu onye na-akụzi n'otu ụlọakwụkwọ dị n'Aba achọghị ka a kpọọ aha ya gwara BBC Igbo na nke a bụ ihe mwute nye ya nakwa ndị otu ya a chụrụ n'ọrụ.

Ya bụ onye nkuzi so na ndị ọrụ nkuzi dị 5,666 n'ime 5,853 e nyere ọrụ n'afọ 2018 ruo 2020 mana Gọọmenti Abịa chụrụ ha n'ọrụ ụbọchị Wenezde.

Nwa amadị ahụ kọwara na ya tinyere akwụkwọ ịchọ ọrụ n'usoro ziri ezi, lee ule, a gbaa ya ajụjụọnụ, tupu e were ya n'ọrụ dịka onye nkuzi.

Ọ sị n'ime akwụkwọ ozi nnabata n'ọrụ e nyere ya na o nweghi ihe dịka e jighi 'waiver' bụ ebe gọọmentị gbakwasịrị ụkwụ chụọ ha n'ọrụ.

Ọ sị na kemgbe ọ malitere ọrụ n'ọnwa Maachị 2019 rue mgbe a chụrụ ha n'ọrụ na o ritubeghi ụgwọọnwa.

Onye nkuzi a sị na ugbua a gbawara ya aka ọrụ "kedụ ihe o ji azụ ezinaụlọ ya?"

Ọ kpọkwara oku ka gọọmentị chegharịa uche n'ihe ha mere ha.

Ihe otu ndị nkuzi (NUT) kwuru

N'okwu achụmnọrụ ahụ, onyeisi otu jikọtara ndị nkuzi n'Aba-North bụ Charles Njoku bụ gwara BBC Igbo na otu ndị nkuzi anọkọbeghi kpaa maka ya, na mgbe ha zukọchara na ozi ha ga-apụta.

Ọ sị na ndị otu ha a chụrụ n'ọrụ bụ ndị e nyere ọrụ nchere oge ruo mgbe gọvanọ ga-enye ikike (waiver) ka e wee ha n'ọrụ n'uju.

Ọ sị na ha gbasoro usoro e ji ewe ndị nkuzi n'ọrụ dịka itinye akwụkwọ, ile ule nakwa ịza ajụjụọnụ tupu ha amalite ọrụ.

Njoku nyere gọọmentị ndụmọdụ ka ha chọọ ụzọ nabata ndị nkuzi a n'ọrụ n'ihi na ndị a nwere ọrụ ha na-arụ n'ụlọakwụkwọ.

Ọ sị na ọtụtụ n'ime ha arụọla ọrụ otu afọ "a bịa ugbua kwụsị ha ọrụ n'ike na-akwụghị ụgwọ.'

Kedụ ihe gọọmentị kwuru?

Mana odeakwụkwọ mịnịstrị agụmaakwụkwọ Sekọndịrị bụ Lawrence Ogbonna bụ onye gọọmentị nyere ezumike nka n'ike sị sị na o nweghi ihe ọ ga-ekwu na ọ bụ n'aka kọmishọna agụmaakwụkwọ ka ọ dị n'aka ịsa ajụjụ banyere ya.

Mana kọmishọna agụmaakwụkwọ n'Abia Steetị bụ ọkammụta K.C Nwangwa gwara BBC Igbo na ndị a esighi usoro ziri ezi bata n'ọrụ.

Ọ sị na Gọvanọ Okezie Ikpeazu machiri iwe ndị mmadụ n'ọrụ ma ọ bụrụ na o sighi n'aka ya.

Kama na odeakwụkwọ ministri agụmaakwụkwọ gara n'ihu na-enye ndị mmadụ ọrụ buru n'obi na gọvanọ ga-akwado ya.

Nwanga sị na e meziri nnyocha chọpụta na ọtụtụ na-arụ ọrụ n'enweghi ikike ọrụ, na ọ bụ ya mere gọvanọ ji nye iwu ka ha kwụsị.

Ọ sị na o nweghị ndị gọọmentị chụrụ n'ọrụ makana onweghi ndị gọọmentị were n'ọrụ na mbụ, nke o ji eji ha ụgwọọnwa.

"Gọọmentị ọ na-achụ ndị ọ na-eweghi n'ọrụ?" Ngwangwa kwuru.

Kama na ọ bụrụ ndịisi ụlọakwụkwọ sị na ha chọrọ ndị nkuzi, na a ga-esikwa n'ime mmadụ puku ise were ndị nkuzi.

Akụkọ ndị ọzọ ga-amasị gị: