King of Satan/Simon Odo: "Abụ m Eze Ekwensu, ekwensu bụ nna m"

Aha onyonyo, Etu m siri bụrụ Eze Ekwensu

Dibia anya nzu bụ Simon Odo e ji 'eze Ekwensu' maara kwadoro ọfụma tupu ọ nwụọ.

Otu nwa ya nwoke gwara BBC Igbo na ọ sị ka e were ụgbọala ingine ya na-asụ asụ, e tinyere ekwuo Osadebe na-asụ n'ime ya lie ya ma ọ nwụọ.

Ọ sị na ọ hapụụrụ ha ego n'ime ụlọ nke ọ sị ka ha were lie ya dịka 'eze' ọ bụ.

Ka ha emepela ụlọ ahụ ruo otu izuụka ọ nwụchara, tupu ha emepeela ma were ego ọ hapụrụ ebe ahụ maka akwamozu ya.

Ọ gaara n'ihu sị na 'eze Ekwensu' sị ka ha etinyekwala ya n'ụlọ ozu bụ 'mortuary' ma ọ nwụọ.

E ji ụgbọala lie 'eze Ekwensu' lara mmụọ

Ụmụ Simon Odo e ji eze ekwensu wee mara akọwaala etu e si lie nna ha n'abalị ụnyahụ bụ December 14,2021.

Uchenna Odo bụ nwa ya nwoke kwuru na e ji ụgbọala lie nna ya n'abalị ahụ.

O kwuru na agbanyere mmanụ ụgbọala n'ụgbọala ahụ, gbanye egwu, tinye ọkụ ihu ụgbọala ahụ ma mee ka ingin ụgbọala ahụ na-asụ ma buru ozu Eze ekwensu chewee ya aka n'igwe e ji anya ụgbọala.

Simon Odo nwụrụ ka ọ gbachara afọ 74

Ebe foto si, Screengrab from youtube

Nkọwa foto, Simon Odo nwụrụ ka ọ gbachara afọ 74

Ụmụ ya kwuru na etu a e si were ụgbọala lie ya gosiri na ọ ga-enwe ije awele banye ụwa ọzọ chi ya dowere ya.

Ha kwuru na usoro olili a bụ nke Simon Odo si ka emere ya mgbe ọ dị ndụ.

Ụmụ nwanne Odo kwuru na ha na-echeta nwanne ha dịka ezigbo mmadụ hụrụ ọha n'anya site n'ezigbo ihe ọ na-emere ndị mmadụ.

Odo nwụrụ n'ụzụ ụtụtụ tusde bụ ụbọchị Disemba 13,2021.

Ili ebe eliri Simon Odo

Etu Eze ekwensu si laa mmụọ

Maazị Simon Odo, onye a ma ama dịka "Eze Ekwensu" anwụọla ka ọ gbachara afọ 74.

Nwa Odo bụ Uchenna Odo kwuru na nna ya nwụrụ n'ebe Elekere atọ nke ụzọ ụtụtụ taa bụ Tuzde ka ọ rịachara ọrịa nwa oge.

Uchenna Odo a ma dịka 'rainmaker' gwara BBC Igbo n'ekwentị sị "Ọ nwụọla. A na-akwado ili ya n'abalị a."

Odo, onye Aji n'Okpuruọchịchị Igboeze North dị n'Enugwu Steeti, bụ onye dibia a na-anụ aha ya.

Onye lụrụ nwaanyị 57, Odo gwaburu BBC Igbo na mkparịtaụka na ya amaghị ọnụọgụgụ ụmụ ya na ndị nwunye ya mụrụ.

'Abụ m Eze Ekwensu, Ekwensu bụ nna m'

Simon Odo na-aza Eze Ekwensu ma sịkwa na o bụ Ekwensu bụ nna ya.

Ọ sị na njem ya na ịgba afa na-ịrụ ọrụ dịka dibia malitere oge ọ bụ otoroọbịa.

Ọ kọwakwara etu o siri nụọ nwaanyị iri ise na asaa ma mụọ ụmụ agụta agụta.

Onye bụ Eze Ekwensu?

  • Eze ekwensu bụ Simon Odo.
  • Ọ kpọrọ onwe ya onye ozi ekwensu na-emere ya omerịa n'ofufe ekwensu n'arụsị ya.
  • Ọ sị na ọ bụbu onye ụka Katolik, mere ọmụmụ mmiri 'baptism' ma kọnfamashọn ya n'afọ 1958 bụrụkwa 'mass server' n'afọ 1959 ruo 1960.
  • Odo sị na ndụ ya gbanwere mgbe o nwere ụkwaranta ọ rịara afọ ise.
  • Ọ sịkwa na ahụ ya bidoro rewe mgbe mmadụ kọrọ ya ọgụ, ma gosikwa BBC Igbo ebe ụkwụ ya rere ure.
  • Ọ sị na ọ gara Ijebu Ode ebe ọ na-achọ ngwọta ya bụ ahụ ure.
  • Eze Ekwensu si na ọ naghị eji ofufe ekwensu egbu mmadu.
  • Simon Odo bụ Eze Ekwensu jiri ọnụ ya gwa anyị na ọ nwere nwuye 57, ụmụ karịrị 300 ma nwekwa ụmụụmụ karịrị 170.
  • Otu nwaada ya gwara BBC Igbo na Eze Ekwensu anaghị akwụsị ya eje ụka ya.
  • Otu n'ime ụmụ ya nwoke si na ndị ọgbọ ya ji maka nna ya na ofufe ya agbara ya ọsọ.
  • Ọ sị na ekwenmnsu emeela ya aba ụba.
  • Ezeekwensu nwụrụ n'ọnwa Novemba 2021 ka ọ dị afọ 74.
  • Ejiri ụgbọala ọhụrụ lie ya dịka o ji wee chọ.

Lee akụkọ ya lee:

Ndi gbara ya ajụjụọnụ bụ Ebere Ekeopara na Nnamdi Agbanelo.

Akụkọ ndị ọzọ ga-amasị gị: