Ndị uweojii anwụchiela onye ohi zuru n'ọdọọgwụ

Ndị uweojii nọ n'Enugwu steeti ekwuola na aka ha akparala onye a na-ebo ebubo na ọ bụ oji egbe ezu.

Ha nwụchiri nwa amadị a kpọrọ Okwudili Okechukwu, onye Umuleri dị na Anambara steeti maka iji egbe wakpo ma zuo ohi n'ebe a na-ere ọgwụ dị n'ụzọ University of Nigeria Teaching Hospital n'Enugwu.

Ebe ha zuru ọtụtụ ihe gụnyere igwe kọmputa nke a na-ebu n'aka, ekwenti nakwa ego pụtara puku narị naira abụọ, ịrị atọ na anọ(N234,000).

Ọnụ na-ekwuru ndị uweojii Enugwu bụ Ebere Amaraizu, gwara BBC na ihe ahụ mere n'ezie.

O kwuru na Okechukwu na ndị otu ndị a ka na-achọ achọ iji wakporo ọdọ ngwa ọgwụ(pharmacy) zuo ọtụtụ ihe gụnyere laptọp, ekwentị na ego.

Ọ kọwara na ọ bụ ndị uweojii nọ n'ogige 'Central Police Station', Enugwu ndị zara mbeku ndị ihe metụtara nwụchiri Okechukwu, ebe ndị otu ya gbalagara.

Ọ gara n'ihu kwuo na e nwetara ihe ndị ha zuru nakwa na Okechukwu "na-enyere anyị aka ime nyocha ihe mere".

Akụkọ ga-amasị gị: