Erling Haaland shine gwarzon dan kwallon Agusta a Bundesliga

Dan kwallon Borussia Dortmund Erling Haaland shine gwarzon dan kwallon kafa a gasar Bundesliga na watan Agusta.

An fara gasar Bundesliga ta bana ranar 13 ga watan Agustan 2021, inda Borussia Dortmund ta fara da doke Eintracht Frankfurt da ci 5-2 ranar 14 ga watan Agustan 2021.

A karawar ce Haaland ya ci biyu ya kuma bayar da biyu aka zura a ragar Eintracht Frankfurt, sai kuma Dortmund ta yi rashin nasara da ci 2-1 a gidan Freiburg ranar 21 ga watan Agusta.

Wasan mako na uku kuwa ranar 27 ga watan Agusta, Dortmund ta yi nasara a kan Hoffenheim da ci 3-2, inda Haaland ya ci kwallo na uku a fafatawar.

Cikin watan na Agusta ya ci kwallo uku kenan ya kuma bayar da biyu aka zura a raga da ta kai ya zama gwarzon dan kwallon kafa a watan Agusta a gasar ta Jamus ta Bundesliga.

Haaland shine ya ci wa Dortmund kwallo na biyu da suka je suka ci Besiktas 2-1 a wasan farko na cikin rukuni a gasar Champions League ranar Laraba.

Kawo yanzu an buga karawa hudu a kakar bana a Bundesliga, inda dan kwallon Bayern Munich, Robert Lewandowski ke mataki na daya da kwallo shida a raga, sai Haaland na biyu mai guda biyar a raga.

Ranar 19 ga watan Satumba za a buga wasannin mako na biyar a Bundesliga, inda Borussia Dortmund za ta karbi bakuncin Union Berlin, ita kuwa Bayern Munich za ta yi wa Bochum masauki ranar 18 ga watan Satumba.