Paul Pogba: Man Utd ta nemi sabunta kwangilar ɗan wasan Faransa

    • Marubuci, Daga Simon Stone
    • Sanya sunan wanda ya rubuta labari, BBC Sport

Manchester United ta nemi tsawaita kwangilar Paul Pogba da shekara daya, inda dan wasan na tsakiya zai ci gaba da murza leda a Old Trafford har shekarar 2022.

Tsohuwar kwangilar dan wasan mai shekara 27, wanda ya taimaka wa Faransa ta dauki Kofin Duniya, za ta kare a karshen kakar wasan da muke ciki.

Pogba ya murza leda a dukkan wasanni uku na Gasar Firimiya da United ta buga a wannan kakar da muke ciki, ciki har da kashin da suka sha a hannun Tottenham da ci 6-1.

Lokacin da ake hutun tafiya gida, Pogba ya ce babban burinsa shi ne ya murza leda a Real Madrid .

An fahimci cewa an dauki matakin tsawaita kwangilarsa ne a makonnin da suka wuce tun kafin ya yi tsokacin cewa yana son tafiya Madrid.

Pogba ya koma United daga Juventus a kan £89m a shekarar 2016.

Raunin da ya ji a idon sawunsa ya hana shi buga wasanni 22 a kakar wasan da ta wuce.