Kungiyoyin Premier League za su yi aman fam miliyan 340

An sanar wa da kungiyoyin Premier League cewar za su mai do da fam miliyan 340, kudin nuna wasanni a talabijin idan za a ci gaba da kakar bana ba tare da 'yan kallo ba.

A ranar Litinin jami'an kungiyoyin Premier suka yi taro don zakulo hanyar da ya kamata a karkare kakar 2019-20.

Shugabannin sun ce an yi watsi da batun kammala kakar bana a wasu filayen, za kuma su sanar da mahukuntan gasar Premier domin su sake shawara.

Kungiyoyin za su mayar da kudin ne, bayan da za a ci gaba da wasannin ba kamar yadda aka tsara ba tun kan bullar cutar korona.

Haka kuma za a ci gaba da wasannin ba tare da 'yan kallo ba, kuma ba lokutan da aka amince da su wajen nuna gasar ba. .

An yi kiyashin cewar kungiyoyin da ke buga gasar Premier za su samu fam biliyan 9.2 kudin tallata wasannin a kafafen yada labarai tun daga kakar 2019 zuwa 2022.

A baya can shugaban gudanar da wasannin Premiel League, Richard Masters ya yi hasashen za a yi hasarar fam biliyan daya idan aka kasa karkare kakar wasa ta 2019-20.

Cikin watan Maris aka dakatar da gasar cin kofin Premier ta bana a lokacin da Liverpool wadda rabonta da kofin tun shekara 30 ke mataki na daya a kan teburi da tazarar maki 25.