An haramta sa nikabi a jami'ar Alkahira

Jami'ar birnin Alkahira ta kasar Masar ta haramta wa ma'aikatanta mata sanya nikabi a cikin aji.

Jami'ar ta ce ta dauki matakin ne domin saukaka bayani tsakanin dalibai da malamai.

Haramcin shi ne na farko a wata jami'a a Masar kuma masu sharhi na ganin cewar matakin zai janyo cece-kuce.

Dokar ta soma aiki daga ranar Talata.

Galibin mata a Masar na saka Hijabi a bainar jama'a amma kuma cibiyoyin soji sun haramta wa masu nikabi shiga gine-ginensu saboda dalilan tsaro.