ભારત-પાકિસ્તાન વચ્ચેની પહેલી વન-ડે મૅચમાં શું થયું હતું?

એશિયા કપ-2018માં ભારત અને પાકિસ્તાન વચ્ચે 19 સપ્ટેમ્બરે રમાયેલી પ્રથમ મૅચ ભારતીય ક્રિકેટ ટીમે આસાનીથી જીતી લીધી છે. ભારત અને પાકિસ્તાન દુબઈમાં એશિયા કપ-2018માં એકમેકની સામે ટક્કર લઈ રહ્યાં છે. હજી પણ આ પરંપરાગત કટ્ટર હરીફ ટીમ્સ વચ્ચે આ ટુર્નામેન્ટમાં વધુ બે મૅચ રમાવાની છે.

આ અગાઉ બન્ને ટીમો ગત વર્ષે ચૅમ્પિયન્સ ટ્રૉફીમાં ટક્કર થઈ હતી, જેમાં પાકિસ્તાને બાજી મારી હતી.

એક વર્ષ પછી બન્ને દેશો ફરી ટક્કર લઈ રહ્યા છે ત્યારે એ જાણીએ ભારત-પાકિસ્તાન વચ્ચેની પહેલી વન-ડે મૅચની કહાણી, આંકડાની દૃષ્ટિએ.

પહેલી વન-ડે અને પહેલીવાર નોંધાયા રેકૉર્ડ્ઝ

ભારત અને પાકિસ્તાન વચ્ચેની પહેલી વન-ડે મૅચ ક્યારે રમાઈ હતી એ આપ જાણો છો?

પાકિસ્તાન વિરુદ્ધ ભારતના રેકૉર્ડ

પહેલી સદીઃ 1987ની 18 ફેબ્રુઆરીએ ઇડન ગાર્ડન્સમાં કૃષ્ણામાચારી શ્રીકાંતે માત્ર 103 બોલમાં 123 રન ફટકાર્યાં હતાં. તે ભારત દ્વારા પાકિસ્તાન સામેની મૅચમાં પહેલી સદી હતી.

શ્રીકાંતની સદી અને છની સરેરાશ સાથે 238 રનનો સ્કોર નોંધાવવા છતાં ભારત એ મૅચ હારી ગયું હતું. એટલું જ નહીં, એ પ્રવાસમાં રમાયેલી છ વન-ડે મૅચોની શ્રેણી પાકિસ્તાન 5-1થી જીત્યું હતું.

સૌથી વધુ સ્કોરનો રૅકર્ડઃ 2005માં પાકિસ્તાનના ભારત પ્રવાસ વખતે રમાયેલી બીજી વન-ડે મેચમાં મહેન્દ્રસિંહ ધોનીની 123 બોલમાં 148 રનની ધુંઆધાર ઇનિંગ્ઝને લીધે ભારતે નવ વિકેટે 356 રનનો સ્કોર ખડક્યો હતો, જે આજે પણ રેકોર્ડ છે.

સર્વાધિક વ્યક્તિગત સ્કોરઃ આ રેકોર્ડ વિરાટ કોહલીના નામે છે. 2012માં એશિયા કપની મેચમાં 183 રનની વિજયી ઇનિંગ્ઝ રમીને તેઓ 'મૅન ઑફ ધ મૅચ' બન્યા હતા.

સૌથી વધુ રનનો રેકોર્ડઃ બન્ને દેશો વચ્ચેની 67 મેચોમાં 40.09ની સરેરાશ સાથે 2,526 રન નોંધાવવાનો આ રેકૉર્ડ સચિન તેંડૂલકરના નામે છે.

સૌથી વધુ સદીઃ માત્ર 12 ભારતીય ખેલાડીઓએ અત્યાર સુધીમાં પાકિસ્તાન સામે સદી ફટકારી છે. તેમાં સૌથી વધુ પાંચ સદી સચિન તેંડૂલકરે ફટકારી છે.

પાકિસ્તાન તરફથી સલમાન બટે ભારત વિરુદ્ધની 21 ઈનિંગ્ઝમાં વિક્રમસર્જક પાંચ સદી ફટકારી છે.

સર્વશ્રેષ્ઠ બૉલિંગઃ ભૂતપૂર્વ ભારતીય કેપ્ટન સૌરવ ગાંગૂલીના નામે આ રેકૉર્ડ છે. તેમણે 10 ઓવરમાં 16 રન આપીને પાંચ વિકેટો ઝડપી હતી અને ત્રણ મેડન ઓવર ફેંકી હતી.

બૅટ્સમૅનની સર્વશ્રેષ્ઠ સરેરાશઃ મહેન્દ્રસિંહ ધોનીએ 30 ઈનિંગ્ઝમાં આઠ વખત અણનમ રહીને 55.90ની સરેરાશ સાથે 1,230 રન નોંધાવ્યાં છે, જે પાકિસ્તાન વિરુદ્ધ કોઈપણ ભારતીય બૅટ્સમૅનની સર્વશ્રેષ્ઠ સરેરાશ છે.

બીજા ક્યા રેકોર્ડ્ઝ સર્જાયા હતા?

સ્ટ્રાઈક રેટઃ બન્ને દેશો વચ્ચે સૌથી વધુ ઝડપે બૅટિંગ કરનારા બૅટ્સમૅનની વાત કરીએ તો એ છે શાહિદ આફ્રિદી. તેમણે 67 મૅચોમાં 109.09ના સ્ટ્રાઈક રેટ સાથે બેટિંગ કરી છે.

સૌથી વધુ વિકેટ્સઃ વસીમ અકરમે ભારત વિરુદ્ધ 60 વિકેટ્સ ઝડપી છે. બન્ને દેશો વચ્ચેની વન-ડે મેચોમાં સૌથી વધુ વિકેટ ઝડપનારા બૉલર વાસિમ અકરમ છે.

સૌથી વધુ સરસાઈથી જીતઃ આ અગાઉ બન્ને દેશ વચ્ચે ચૅમ્પિયન્સ ટ્રૉફીમાં ટક્કર થઈ હતી અને ત્યારે પાકિસ્તાને ભારતને 180 રને હરાવ્યું હતું.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો