જનરલ બિપિન રાવતનું હેલિકૉપ્ટર દુર્ઘટનામાં નિધન, 14 પૈકી 13 લોકોનાં મૃત્યુ, શૌર્ય ચક્રથી સન્માનિત અધિકારી બચી ગયા

ચીફ ઑફ ડિફેન્સ સ્ટાફ જનરલ બિપિન રાવતનું તામિલનાડુમાં ભારતીય વાયુસેનાના હેલિકૉપ્ટરની દુર્ઘટનામાં મૃત્યુ થયું છે.

ભારતીય વાયુસેનાએ ટ્વીટ કરીને જણાવ્યું કે ખૂબ દુખ સાથે જનરલ બિપિન રાવત, શ્રીમતિ મધુલિકા રાવત અને 11 અન્ય લોકો જે હેલિકૉપ્ટરમાં સવાર હતાં, તેમનું આ દુર્ભાગ્યપૂર્ણ દુર્ઘટનામાં મૃત્યું થયું છે.

વડા પ્રધાન નરેન્દ્ર મોદીએ પણ હેલિકૉપ્ટર ક્રૅશમાં જીવ ગુમાવનાર જનરલ બિપિન રાવતના નિધન અંગે ટ્વિટર પર શોક વ્યક્ત કર્યો હતો.

તેમણે લખ્યું હતું કે, "હું તામિલનાડુમાં થયેલ હેલિકૉપ્ટર ક્રૅશમાં જનરલ બિપિન રાવત, તેમનાં પત્ની અને અન્ય સૈન્ય અધિકારીઓનાં મૃત્યુના સમાચારથી અત્યંત વ્યથિત છું. તેમણે ભારતની સેવામાં અત્યંત પરિશ્રમશીલતા દાખવી હતી. શોકગ્રસ્ત પરિવાર સાથે મારી સંવેદના છે."

ભારતીય સેનાનું હેલિકૉપ્ટર બુધવારે તામિલનાડુના કુન્નુરમાં દુર્ઘટનાગ્રસ્ત થયું છે, હેલિકૉપ્ટરમાં જનરલ બિપિન રાવત સહિત સેનાના વરિષ્ઠ અધિકારીઓ હતા.

સમાચાર એજન્સી પીટીઆઈ અનુસાર તામિલનાડુના નીલગિરીના કલેક્ટર મુજબ ''દુર્ઘટનામાં ભારતીય વાયુસેનાના હેલિકૉપ્ટરમાં સવાર 14 લોકોમાંથી 13 લોકોમું મૃત્યુ થયું છે અને એક વ્યક્તિ બચી છે જે પુરુષ છે.''

સંરક્ષણમંત્રી રાજનાથસિંહ સીડીએસ બિપિન રાવતના દિલ્હીસ્થિત નિવાસસ્થાને રાવતના પરિવારજનોને મળ્યા હતા. રાજનાથ સિંહ ગુરુવારે આ દુર્ઘટના અંગે સંસદમાં નિવેદન આપશે.

MI-17વી5 શ્રેણીનું આ હેલિકૉપ્ટર સુલુરથી વૅલિંગ્ટન જઈ રહ્યું હતું.

હેલિકૉપ્ટર સુલુરના આર્મી બૅઝથી નીકળ્યું હતું. જનરલ રાવતને લઈને આ હેલિકૉપ્ટર વૅલિંગ્ટન સૈન્ય બૅઝ તરફ જઈ રહ્યું હતું.

જનરલ રાવતે એક જાન્યુઆરી 2020ના દેશના પ્રથમ ચીફ ડિફેન્સ ઑફ સ્ટાફ તરીકે પદભાર સંભાળ્યો હતો.

હેલિકૉપ્ટરમાં કોણકોણ હતું સવાર?

ક્રેશ થનાર હેલિકૉપ્ટરમાં ક્રૂ મૅમ્બર સહિત કુલ 14 લોકો સવાર હતા તેમ ડીડી ન્યૂઝ અને અન્ય સમાચાર સંસ્થાઓ જણાવે છે. આ 14 લોકોમાં નવ લોકો સેનાના હતા, જેમની યાદી આ મુજબ છે.

કોણ છે ભારતના પ્રથમ કમાંડર-ઇન-ચીફ જનરલ બિપિન રાવત?

જનરલ રાવતના નિધન પર પ્રતિક્રિયા

સંરક્ષણમંત્રી રાજનાથ સિંહે ટ્વીટ કરીને જનરલ બિપિન રાવતના નિધન પર દુખ વ્યક્ત કર્યું છે.

રાજનાથ સિંહે કહ્યું કે "તામિલનાડુમાં એક દુખદ દુર્ઘટનામાં ચીફ ઑફ ડિફેન્સ સ્ટાફ જનરલ બિપિન રાવત, તેમનાં પત્ની અને 11 અન્ય સૈન્ય અધિકારીઓનાં મૃત્યુ પર હું ખૂબ દુખી છું. તેમનું નિધન દેશ માટે અને સેના માટે એક એવું નુકસાન છે જેની ભરપાઈ ન થઈ શકે."

ગૃહ મંત્રી અમિત શાહે કહ્યું કે, "આ એક દુખદ દિવસ છે કારણ કે આપણે આપણા સીડીએસ જનરલ બિપિન રાવતજીને એક દુખદ દુર્ઘટનામાં ગુમાવી દીધા છે. તેઓ સૌથી બહાદુર સૈનિકોમાંથી એક હતા જેમણે દેશની સેવા કરી. તેમના અભૂતપૂર્વ યોગદાનનો શબ્દોમાં ઉલ્લેખ ન કરી શકાય. હું ખૂબ દુખી છું."

સીડીએસ જનરલ બિપિન રાવતના નિધન પર ભારતીય સેનાએ આધિકારિક નિવેદનમાં કહ્યું કે ભારતીય સેના પ્રમુખ જનરલ એમ.એમ. નરાવણે તથા સમગ્ર સેના ચીફ ઑફ ડિફેન્સ સ્ટાફ જનરલ બિપિન રાવત, શ્રીમતિ મધુલિકા રાવત, ડિફેન્સ વાઇવ્ઝ વેલફેયર એસોસિએશન અને 11 અન્ય સેનાધિકારીઓના નિધન પર દુખ વ્યક્ત કરે છે.

આ સિવાય ભારતીય રાષ્ટ્રીય કૉંગ્રેસના નેતા રાહુલ ગાંધીએ પણ આ અકસ્માત અંગે ટ્વિટર પર લખ્યું હતું કે, "હું જનરલ બિપિન રાવત અને તેમનાં પત્નીના પરિવારજનોને શોક વ્યક્ત કરું છું. આ એક અભૂતપૂર્વ દુર્ઘટના હતી. આ મુશ્કેલ સમયમાં તેમના પરિવાર પ્રત્યે સંવેદના વ્યક્ત કરું છું. તેમજ આ દુર્ઘટનામાં જીવ ગુમાવનાર અન્યોને પ્રત્યે શોકની લાગણી વ્યક્ત કરું છું."

પાકિસ્તાનની સેનાએ પણ જનરલ રાવતના નિધન પર શોક વ્યક્ત કર્યો છે.

પાકિસ્તાનની સેનાના પ્રવક્તા અનુસાર સેના પ્રમુખ જનરલ કમર જાવેદ બાજવા અને જનરલ નદીમ રજાએ હેલિકૉપ્ટર ક્રૅશમાં જનરલ રાવત અને તેમનાં પત્નીનાં મૃત્યુ પર દુખ વ્યક્ત કર્યું છે.

હેલિકૉપ્ટરમાં ક્રૅશમાં બચી જનાર એકમાત્ર વ્યક્તિ કોણ છે?

સમાચાર સંસ્થા એએનઆઈ મુજબ આ દુર્ઘટનામાં ભારતીય વાયુસેનાના ગ્રૂપ કૅપ્ટન વરુણ સિંહ ઈજાગ્રસ્ત થયા છે.

હેલિકૉપ્ટરમાં સવાર 14 લોકોમાંથી દુર્ઘટનામાં બચી જનાર એકમાત્ર વ્યક્તિ તેઓ જ છે.

તેમને આ વર્ષે શૌર્ય ચક્રથી સન્માનિત કરવામાં આવ્યા હતા. તેમને એલસીએ તેજસ ફાઇટર ઍરક્રાફ્ટને વર્ષ 2020માં એક હવાઈ ઇમર્જન્સી બચાવવા માટે શૌર્ય ચક્રથી સન્માનિત કરવામાં આવ્યા છે.

તેમની સારવાર સૈન્ય હૉસ્પિટલમાં થઈ રહી છે.

તમે અમનેફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો