Man Utd yagennye Rangnick nk'umutoza w'agateganyo

Manchester United yagennye Ralf Rangnick nk'umutoza w'agateganyo kugeza shampiyona irangiye, namara kubona ibisabwa kuri visa y'akazi.

Uyu mugabo w'imyaka 63 asimbuye Ole Gunnar Solkjaer, wirukaywe ku itariki ya 21/11 nyuma yo gutsindwa na Watford.

Rangnick yavuye ku mwanya we nk'umuyobozi w'imikino no guteza imbere imikino mu ikipe ya Lokomotiv Moscow yo mu Burusiya kugira ngo aze muri Manchester United.

Yagize ati:

"Ndanezerewe kujya muri Manchester United no gutuma iyi shampiyona igenda neza,"

Nyuma y'iyi shampiyona, Rangnick azaguma Old Trafford mu mwanya w'umujyanama mu myaka ibiri.

Umukino we wa mbere ashobora gutoza United, iri kumwanya wa munani muri shampiyona [Premier League], ushobora kuba Arsenal ku wa Kane niba ubusabe bwa visa y'akazi bwe bukozwe ku gihe.

Nibitagenda gutyo, Michael Carrick uri gutoza by'agateganyo azaguma ku mwanya.

Rangnick yongeyeho ati:

"Ikipe yuzuyemo impano kandi ifite urubyiruko n'inararibonye,"

"Umuhate wanjye wose mu mezi atandatu ari imbere uzaba gufasha aba bakinnyi kugera ku bushobozi bwabo ku giti cyabo, ariko by'ingenzi, ku buryo bw'ikipe."

"Nyuma y'ibyo, niteguye gufasha ikipe mu ntego zayo z'igihe kirekire, mu mwanya w'ubujyanama."

Rangnick yubatse isura nziza cyane mu gihe cye cy'ubutoza mu Budage, abatoza ba Liverpool Jurgen Klopp na Thomas Tuchel wa Chelsea bavuga neza cyane mwene wabo basangiye igihugu.

Yagejeje ikipe ya Ulm mu cyiciro cya mbere cya shampiyona y'Ubudage, Bundesliga, ku nshuro ya mbere aza gutoza andi makipe nka Stuttgart, Hannover, Hoffenheim, Schalke na RB Leipzig.

Yatwaye igikombe cy'Ubudage [German Cup] atoza Schalke muri 2011 anageza RB Leipzig ku mukino wa nyuma w'iryo rushanwa muri 2019.

Muri shampiyona ya 2010-2011, yagejeje Schalke muri kimwe cya kabiri cya Champions League, aho batsinzwe na United 6-1, nayo itsindwa na Barcelona ku mukino wa nyuma.

MIchael Carrick ni we wari uri mu mwanya w'ubutoza by'agateganyo kuva Solskjaer yagenda ndetse yanatsinze Villarreal byatumye Manchester United ikomeza mu cyiciro gikurikiye cya Champions League iri ku isonga mu itsinda ryayo.

Yanatoje Manchester United mu mukino yanganyije na Chelsea 1-1 ku Cyumweru.

Carrick, n'abandi bagize itsinda ry'abatoza bazaguma mu ikipe, mu gihe Rangnick azazana abandi bantu bacye bo kumufasha yihitiyemo.