Mikel Arteta: Umutoza wa Arsenal yashimagije 'umunsi wihariye' yatsinzeho Tottenham 3-1

Inyandiko gusa
Emile Smith Rowe yishimira intsinzi

Ahavuye isanamu, EPA

Insiguro y'isanamu, Mikel Arteta yavuze ko Arsenal "yagize guhuza neza kw'abakinnyi bakuru n'abato" ubwo yatsindaga Tottenham

Umutoza wa Arsenal Mikel Arteta yashimagije "umunsi wihariye" nyuma yuko ku cyumweru ikipe ye irushije ikanatsinda Tottenham mu mukino w'aba bacyeba bo mu majyaruguru ya London, Perezida Kagame we avuga ko "uwakoze neza akwiye gushimwa".

Arsenal yatsinze Tottenham ibitego 3-1, byinjijwe na Emile Smith Rowe ku munota wa 12, Pierre-Emerick Aubameyang ku wa 27 na Bukayo Saka ku munota wa 34, mu gihe icya Tottenham cyinjijwe na Son Heung-min ku munota wa 79.

Iyo ntsinzi yashyigikiye kuraguza umutwe kwari kwakozwe na Gaël Clichy wahoze ari myugariro wa Arsenal wari wavuze ko Arteta "ashobora kuba Arsène Wenger w'ejo hazaza".

Arteta, w'imyaka 39, yagize ati: "Uyu munsi ni urugero rumwe rw'ibyo dushobora gukora. Ni umunsi wihariye".

Yongeyeho ati: "Iyi ntsinzi ni iy'abafana. Barahabaye ubwo twari ducyeneye ukudushyigikira kwabo none ubu turimo gushyiraho icyo [kintu] kiduhuza n'abafana".

Kuri Twitter, Perezida w'u Rwanda Paul Kagame, uzwiho kuba ari umufana w'iyi kipe, inafitanye amasezerano n'u Rwanda yo kurwamamariza ubukerarugendo azwi nka 'Visit Rwanda', yagize ati:

"Mwakoze neza Arsenal,umutoza,abakinnyi kandi cyane cyane...abafana!!! Buri kintu cyose cyashobotse cyane uyu munsi. Amahirwe masa kuri buri mukino... Byiza cyane!!"

Mu kwezi kwa munani, ubwo Arsenal yari imaze gutsindwa na Brentford 2-0, Perezida Kagame yari yanenze bikomeye Arsenal, avuga ko abafana nka we "batagomba kwihanganira cyangwa kwemera umusaruro mubi cyane".

Skip Ibisomwa cane and continue reading
Ibisomwa cane

End of Ibisomwa cane

Arsenal yatangiye nabi shampiyona y'uyu mwaka, harimo no kunyagirwa na Man City ibitego 5-0, ubwo yatsindwaga imikino yayo itatu ibanza.

Tambuka X ubutumwa
Uremeye ibiri kuri X?

Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.

Uragaba: Ibitangwa n'izindi mbuga bishobora kubamwo gutangaza

Impera ya X ubutumwa

BBC ntibazwa ibivuye ku zindi mbuga.

Ariko nyuma y'akaruhuko gatafwa ngo abakinnyi b'abanyamahanga bashobore gukinira amakipe y'ibihugu byabo, yashoboye kongera kwisuganya itsinda imikino itatu yikurikiranya.

Arteta yakomeje agira ati: "Ntekereza ko mu buzima ugomba kugaragaza ko ushima. Aba bantu [bafana] bashyigikiye iyi kipe n'aba bakinnyi. Iyi ntsinzi ni bo igenewe".

Smith Rowe, winjije igitego cyayo cya mbere, yagize ati: "Bishoboka ko uyu ari wo munsi wa mbere mwiza cyane mu buzima bwanjye. Kuba umuryango wanjye na wo wari uri hano, ndimo kwiyumva mu buryo bwihariye".

Yanashimagije uruhare rwa Arteta, agira ati: "Adusaba gutuza gusa, abafana na bo batuma twigirira icyizere cyinshi cyane".

Kuva ahabi ijya aheza

Clichy - wakinnye muri Arsenal ku bwa Wenger mu gihe cy'imyaka umunani - yakoranye na Arteta ubwo yari umutoza wa Manchester City, yemeza ko uyu Munya-Espagne afite ibishoboka byose byo gutuma yubaka umurage muri Arsenal.

Yabwiye ikiganiro BBC Radio 5 Live ati: "Arteta afite ubumenyi bwinshi cyane kandi yagize amahirwe yo kwigira kuri Pep [Guardiola].

"Rwose nemeza ko mu gihe kirekire kiri imbere ashobora kuba Arsène Wenger. Ni muto cyane, kandi mu by'ukuri nemeza ko, uko igihe kizagenda gishira, azahinyuza abantu [batamwemera]".

Wenger yatoje Arsenal hagati ya 1996 na 2018, ayigeza ku bikombe bitatu bya Premier League no ku bikombe birindwi bya FA Cup.

Mu mwaka wa 2004, yanabaye umutoza wa mbere - kandi umwe gusa kugeza ubu - watoje ikipe igasoza shampiyona ya Premier League idatsinzwe umukino.

Abafana ba Arsenal

Ahavuye isanamu, PA Media

Arteta, umaze umwaka wuzuye atoza Arsenal, yitwaye neza mu gice cya mbere cy'umwaka yayitoje, ayigeza ku gikombe cya FA Cup mu 2020, ibigeraho inatsinze Manchester City na Chelsea.

Ariko uwo mwaka wa 2019-2020 wabaye mubi, intsinzi eshanu zikurikiranya mu gusoza shampiyona zihisha ishusho ngari y'umwaka waranzwe no kwitwara nabi.

Arsenal isoza ku mwanya wa munani, ndetse ubu, ku nshuro ya mbere mu myaka 25 ishize, nta rushanwa ry'i Burayi izitabira.

Uku gutsinda gutumye Arsenal inyura kuri Tottenham - iyi yatsinze imikino yayo itatu ibanza ariko ubu ikaba yatsinzwe imikino itatu yikurikiranya. Ariko Arsenal iracyari ku mwanya wa 10 kandi iracyari kure y'amakipe atatu ya mbere ari yo Liverpool, Manchester City na Chelsea.

Ukwezi kwa cumi kurimo imikino iteye amashyushyu, kandi wenda iyi izatuma ibintu birushaho gusobanuka ku ishusho nyayo ya Arsenal - no ku kumenya niba Arteta ashobora gutanga indi gihamya yo gushyigikira ibivugwa na Clichy.