Brentford 2-0 Arsenal: 'Arsenal n'abafana ntidukwiye kumenyera ibi....OYA !!! – Kagame

Inyandiko gusa
Umukinnyi wa Arsenal (ibumoso) n'uwa Brentford bagundanira umupira ku wa gatanu tariki ya 13/8/2021, ku kibuga cya Brentford

Ahavuye isanamu, Getty Images

Perezida w'u Rwanda Paul Kagame, uzwiho kuba ari umufana wa Arsenal, avuga ko "impinduka yatinze cyane" muri iyi kipe yo mu majyaruguru y'umurwa mukuru London w'Ubwongereza, nyuma yuko itsinzwe kwa Brentford 2-0.

Nyuma yo kumara imyaka 74 idakina muri Premier League, ku wa gatanu Brentford yongeye gukina umukino muri iyi shampiyona.

Mu rukurikirane rw'ubutumwa bwo kuri Twitter buri mu Cyongereza, Kagame yagize ati:

"Brentford yari ikwiye gutsinda kandi yabikoze. Tuvuye ku by'umukino ubwawo Arsenal n'abafana ntidukwiye kumera nk'abamenyera ibi....OYA !!! Ndabivuga nk'umwe mu bafana bakomeye ba Arsenal. Impinduka yaratinze cyane!"

Ati: "Ni urugamba rumaze imyaka ibarirwa hafi mu icumi... kugeza ubu. Ntidushobora kugira gahunda itanga umusaruro bya nyabyo??"

Kuva mu mwaka wa 2018, leta y'u Rwanda ifitanye amasezerano na Arsenal FC atavugwaho rumwe yo kwamamaza ubukerarugendo bw'u Rwanda afite agaciro karenga miliyoni 30 z'amapawundi (agera kuri miliyari 41 mu mafaranga y'u Rwanda).

Umukinnyi Albert Sambi Lokonga wa Arsenal mu mukino wa Premier League wayihuje na Brentford, ku wa gatanu ku itariki ya 13 y'ukwa munani mu 2021

Ahavuye isanamu, Getty Images

Akubiyemo kwambara ikirango cya 'Visit Rwanda', gikangurira abakerarugendo gusura u Rwanda, kigaragara ku mipira yambarwa n'abakinnyi ba Arsenal.

Abanenga leta y'u Rwanda bavuga ko ayo masezerano ari urugero rw'ukuntu umutegetsi w'umunyagitugu w'igihugu gicyennye cyo muri Afurika, atera inkunga y'amafaranga ikipe y'umupira w'amaguru ikize cyane.

Skip Ibisomwa cane and continue reading
Ibisomwa cane

End of Ibisomwa cane

Ariko leta y'u Rwanda yo yatangaje ko kwamamaza n'ikipe ikomeye ku isi nka Arsenal ari ishoramari rizaha inyungu nini ubukungu bw'u Rwanda biciye mu bukerarugendo.

Paul Kagame (ifoto yo mu 2019)

Ahavuye isanamu, Reuters

Insiguro y'isanamu, Paul Kagame ntabwo yishimiye imikinire y'ikipe afana ya Arsenal (ifoto yo mu 2019)

Mu butumwa bwe bwo kuri Twitter, Bwana Kagame yanagiriye inama Arsenal, ati:

"Hamwe mu hantu ho kwitabwaho ni uburyo twitwara ku isoko - abakinnyi tugura bo gufasha gushyira gahunda mu bikorwa. Imitekerereze yo gutomboza ntizana impinduka".

"NTABWO tugomba kwihanganira cyangwa kwemera umusaruro mubi cyane. Ikipe igomba kubakwa ifite intego yo gutsinda gutsinda gutsinda. Kugira ngo niba dutsinzwe.... bibe bitari byitezwe!"

"Nzi neza ko twese tuzi uwikoreye umutwaro uremereye cyane kurusha abandi. Nizeye ko na bo babizi cyangwa ko nibura babyemera!!!"

Ku butegetsi bwa Perezida Kagame, raporo ya Banki y'isi yo mu 2018 ishima u Rwanda kubera "ibyagezweho bikomeye mu iterambere". Gusa hari abashakashatsi bamwe bigenga bakemanga imibare ijyanye n'igipimo cy'ubucyene mu gihugu.

Bwana Kagame ananengwa mu gihugu no mu mahanga guhonyora uburenganzira bwo muri politiki n'ubundi burenganzira bwa muntu.