Ububiligi 1-0 Portugal: 'Igihe ni iki cyangwa nta kindi' ku 'rungano rw'intyoza' rw'Ububiligi?
Ahavuye isanamu, Getty Images
'Urungano rw'intyoza' rw'Ububiligi rumaze iminsi irenga 1,000 ruri ku mwanya wa mbere ku isi mu mupira w'amaguru, ariko nta mudari wo kubihamya rufite. Irushanwa rya Euro 2020 ryaba noneho ari wo mwaka warwo wo kwigaragaza?
Muri kimwe cy'umunani, iyi kipe yasezereye Portugal yegukanye igikombe cy'ubushize, ndetse igeza ku mubare ungana n'uw'intsinzi nyinshi yari isanganwe wo mu irushanwa rikomeye, itsinda gatanu yikurikiranya ku nshuro ya kabiri itozwa na Roberto Martinez.
Iyi kipe, yuzuyemo abakinnyi b'impano mu mupira w'amaguru, nta na rimwe yigeze kuba yujuje ibyatuma yegukana igikombe kurusha uko imeze ubu, mu gihe yitegura guhura n'Ubutaliyani muri kimwe cya kane.
Ariko byasabye igitego gihebuje cya Thorgan Hazard (murumuna wa Eden Hazard) kugira ngo ihigike Portugal, mu gihe abakinnyi bakomeye Kevin De Bruyne na Eden Hazard b'iyi kipe bavunikiye muri uwo mukino.
Martinez yagize ati: "Nk'umutoza, nta kundi nariguterwa ishema [n'abakinnyi banjye] kurusha uku".
"Twakinnye n'ikipe ya mbere i Burayi mu 'kumenya gutsinda'. Ni cyo kizamini cya mbere gikomeye duhuye na cyo kugeza ubu".
Ariko myugariro Thomas Vermaelen yavuze ko Ububiligi "bwagize amahirwe yo gutsinda". Nonese ubu bwaba bugiye gukomeza kugeza bwegukanye iki gikombe?
'Igihe ni iki cyangwa nta bundi bizongera' ku Bubiligi?
Ububiligi bufite abakinnyi bafite impano y'umupira w'amaguru, ariko nta gihe kinini basigaje mu gukina umupira.
Ku bakinnyi 11 babanje mu kibuga ku mukino wabahuje na Portugal, muri rusange buri mukinnyi afite imyaka 30 n'iminsi 148.
Iyo ni yo myaka ya mbere myinshi muri rusange ku mukinnyi w'Ubibiligi mu mukino wa Euro kugeza ubu, kandi ni na yo ya mbere myinshi muri rusange ugereranyije n'andi makipe yitabiriye Euro 2020.
Ububiligi bwasezerewe na Wales (Pays de Galles) muri kimwe cya kane muri Euro yo mu 2016, ndetse busezererwa n'Ubufaransa muri kimwe cya kabiri cy'igikombe cy'isi cya 2018, ubu Bufaransa ni bwo bwacyegukanye.
Umunyamakuru ku mupira w'amaguru w'Umubiligi Kristof Terreur yabwiye BBC Radio 5 Live ati:
"Tumaze iminsi irenga 1,000 turi ku mwanya wa mbere ariko nta kintu na kimwe turatsindira. Ubu tugomba gutanga umusaruro. Igihe ni iki cyangwa ntibizongere ukundi kuri uru rungano".
"Uko niyumvaga by'ukuri mu Burusiya [mu gikombe cy'isi cya 2018] ni uko twari tugiye kubigeraho, ubu ibyo ntabwo mbyiyumvamo. Ibi biragoye".
"Ariko ubu dufite abatsinze kuri buri mwanya kandi bakikijwe n'abantu na bo batsinze. [Umutoza wungirije w'Ububiligi] Thierry Henry, nk'urugero, yatsindiye iri rushanwa kandi yafashije Romelu Lukaku guhinduka umukinnyi utsinda".
Chris Waddle wahoze akina ku ruhande mu ikipe y'igihugu y'Ubwongereza, yongeyeho ati:
"Urebye iyi kipe y'Ububiligi ku rupapuro, nitegukana iri rushanwa haba hari ikibazo".
"Bafite abakinnyi bashoboye ahantu hose. Ndi ikipe iyo ari yo yose sinakwifuza guhura n'Ububiligi..."
"Ububiligi nta yandi mahirwe akomeye arenze aya buzongera kugira yo kwegukana iri rushanwa".
Bugeze muri kimwe cya kane - ariko byabusabye iki?
Ahavuye isanamu, Getty Images
Kumera neza kwa De Bruyne bizagirwaho impungenge mbere yuko bakina n'Ubutaliyani i Munich mu Budage, nyuma yuko avunitse akagombambari nyuma gato yuko igice cya kabiri gitangiye mu mukino na Portugal.
Impungenge z'Ububiligi ku mvune zarushijeho kwiyongera nyuma yuko Hazard na we akojejweho muri uwo mukino.
Kuri izo mvune, umutoza Martinez yagize ati:
"Kwari uguserebeka kubi cyane [kuri De Bruyne]...tuzareba uko bigenda. Ntabwo dufite amakuru y'uko ikibazo yagize giteye. Hazard yagize ikibazo cyo kuvunika umutsi...tuzareba uko bimeze mu masaha 48".
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
BBC ntibazwa ibivuye ku zindi mbuga.
Waddle yongeyeho ati: "Niba batakaje De Bruyne na Hazard icyo ni igihombo gikomeye.
"De Bruyne ni umukinnyi wo ku rwego rwo hejuru cyane. Twizere ko ari ugukorwaho gusa. Ariko akagombabari ke kabaye nk'akajya hejuru kandi yagaragaye atishimye [atanezerewe]. Reka twizere ko azagaruka".
Myugariro Vermaelen yavuze ko intsinzi "yadutwaye imbaraga nyinshi", mu gihe umunyamakuru Terreur atekereza ko igihe cy'urugendo rwerekeza aho umukino uzabera gishobora kuba ikibazo kuri iyi kipe.
Ati: "Baritanze cyane ariko iyi kipe izacyenera ibihe byo kongera kugarura imbaraga.
"Ubutaliyani bubarusha umunsi umwe wo kugarura imbaraga, ariko ibyo nta kinyuranyo gikomeye bizatanga".
"Ububiligi bwakomeje gukora ingendo igihe cyose. Ibyo na byo bikunanizamo gacye".
Ryari irushanwa rya nyuma kuri Cristiano?
Ahavuye isanamu, Getty Images
Hagati aho, intsinzi y'Ububiligi yatumye umukinnyi umaze gutsinda ibitego byinshi muri iri rushanwa asezererwa hamwe na Portugal. Ubu bwaba ari bwo bwa nyuma Cristiano Ronaldo agaragaye mu irushanwa rikomeye?
Uyu rutahizamu wa Juventus, yafashije ikipe y'igihugu cye kwegukana Euro ya 2016, ariko azaba afite imyaka 37 aramutse yitabiriye irushanwa rikomeye rya karindwi - igikombe cy'isi cyo muri Qatar mu 2022.
Umunyamakuru Terreur ati: "Ntabwo nshobora kwiyumvisha na gato ahantu hatari Cristiano Ronaldo".
Carlos Carvalhal, wahoze ari myugariro wa Portugal, yongeyeho ati: "Iyo ataza kugira ibi bitego n'intego, ntabwo yari kuzongera gukina. Nemera ko kuri uru rwego azakina indi myaka ibiri".
"Nemera ko azakina igikombe cy'isi".
