Copa America: Iri rushanwa rigiye kwakirwa na Brazil nyuma yuko Argentina iryatswe
Ahavuye isanamu, Getty Images
Irushanwa ry'uyu mwaka ry'umupira w'amaguru rihuza ibihugu byo muri Amerika y'epfo rigiye gukinirwa muri Brazil, nyuma yuko Argentina iryatswe habura ibyumweru bibiri ngo ritangire.
Impuzamashyirahamwe y'umupira w'amaguru muri Amerika y'epfo (CONMEBOL) yavuze ko Argentina yatswe kuryakira kubera "uko ibintu bimeze ubu".
Iki gihugu gihanganye n'ubwiyongere bw'ubwandu bwa Covid-19.
Ku mugoroba wo ku wa mbere, CONMEBOL yemeje ko Brazil ari yo izakira iri rushanwa, riteganyijwe gutangira ku itariki ya 13 y'uku kwezi kwa gatandatu kugeza ku itariki ya 10 y'ukwezi kwa karindwi.
Kuri Twitter, CONMEBOL yashimiye Perezida wa Brazil Jair Bolsonaro, itsinda bakorana ndetse n'ishyirahamwe ry'umupira w'amaguru muri Brazil "ku gufungurira imiryango y'icyo gihugu irushanwa uyu munsi rya mbere ritekanye ku isi..."
Ariko, Luiz Ramos, umukuru w'ibiro bya perezida wa Brazil, yaburiye ko "nta masezerano ntakuka yari yagerwaho" kandi ko hari ibisabwa bikomeye bigomba kubahirizwa.
Yagize ati: "Turi hagati muri iyi gahunda [y'ibiganiro]. Ariko, ntabwo tuzazarira ku busabe bwuko, niba bishoboka ko bikorwa, bishobora gukorwa".
Ntabwo bizwi ibibuga byakinirwaho iryo rushanwa mu gihe byarangira rikiniwe aha muri Brazil.
Mbere, byari biteganyijwe ko Argentina ifatanya na Colombia kuryakira, ariko Colombia ku itariki ya 20 y'ukwezi kwa gatanu ikurwa ku kuryakira kubera imyigaragambyo mu gihugu.
Muri guverinoma ya Argentina no hanze yayo, hari habayeho kwiyongera kw'abamagana ko iri rushanwa ribera muri icyo gihugu.
Hagati aho muri Brazil, ku wa gatandatu habaye imyigaragambyo y'abamagana uburyo leta ya Perezida Bolsonaro ihanganyemo n'icyorezo cya Covid-19.
Muri Brazil, Covid-19 imaze kwica abantu barenga 460.000 - ba kabiri benshi ku isi nyuma y'abo imaze kwica muri Leta Zunze Ubumwe z'Amerika. Brazil kandi ni cyo gihugu cya gatatu ku isi cyatangaje abayanduye benshi, barenga miliyoni 16.
Sena ya Brazil irimo gukora iperereza ku buryo leta ya Perezida Bolsonaro yitwaye mu guhangana na Covid-19 no kuba yaratinze gutangiza gahunda yo gutanga inkingo za coronavirus.
Brazil ni yo ifite igikombe giheruka cya Copa America, yegukanye mu 2019. Ntabwo iri rushanwa ryabaye mu 2020 kubera icyorezo cya coronavirus.
Buri mukino wa Copa America y'uyu mwaka uzerekanwa 'live' kuri BBC.
