Motjeka Madisha: Uyu mukinnyi wo muri Afurika y'epfo yapfiriye mu mpanuka y'imodoka ku myaka 25

Umukinnyi ukomeye mu mupira w'amaguru w'Afurika y'epfo yapfuye ku myaka 25 nyuma yuko imodoka ye ikoze impanuka igashya igakongoka mu muhanda uri mu burasirazuba bw'umujyi wa Johannesburg.

Uyu wari myugariro w'ikipe ya Mamelodi Sundowns yashoboye gusohoka mu modoka akuba inda hasi akoresha amaboko n'amaguru mbere yuko apfa, nkuko umwe mu bayobozi b'iyo kipe utatangajwe izina yabibwiye ibiro ntaramakuru AFP.

Undi muntu wari muri iyo modoka na we yapfuye, nkuko bivugwa n'ibitangazamakuru byo muri icyo gihugu.

Molefi Ntseki, umutoza w'ikipe y'igihugu y'Afurika y'epfo, yavuze ko "ashenguwe" n'urupfu rw'uwo mukinnyi mu mpanuka "iteye ubwoba".

Mu itangazo umutoza Ntseki yasohoye, yagize ati: "Yari afite ejo hazaza heza ndetse n'imyitwarire ye mu bandi bakinnyi yo kumva ko ibintu bishoboka, iteka yabaga ari ingenzi cyane".

Madisha yari amaze gukinira ikipe y'igihugu y'Afurika y'epfo - izwi nka Bafana Bafana - inshuro 13 ndetse yari myugariro ubanza mu kibuga w'ikipe ya Mamelodi Sundowns.

Iyo kipe ni yo ya mbere imaze kwegukana ibikombe byinshi bya shampiyona yo muri icyo gihugu izwi nka Premier Soccer League (PSL). Mu kwezi kwa cyenda yegukanye icyo gikombe mu mwaka wa gatatu yikurikiranya.

Urubuga rw'amakuru Eyewitness News rwasubiyemo amagambo ya William Ntladi, umutegetsi ukora mu rwego rw'ubutabazi bwihuse aho impanuka yabereye, avuga ko icyayiteye kitaramenyekana.

Ariko yongeyeho ati: "Dushobora kwemeza ko umushoferi yananiwe gukomeza kugenzura imodoka ikagwa mu kintu cyari kiri aho igashya".

Madisha abaye myugariro wa kabiri wa Mamelodi Sundowns upfiriye mu mpanuka y'imodoka mu byumweru bya vuba bishize.

Anele Ngcongca yashyinguwe ku wa kane, nyuma yuko apfiriye mu mpanuka hafi y'umujyi wa Durban uri mu burasirazuba, ku itariki ya 23 y'ukwezi kwa 11.

Ku mbuga nkoranyambaga, abantu batandukanye bifurije Madisha kuruhukira mu mahoro.