Maurizio Sarri arirukanwe nyuma y'umwaka atoza Juventus, asimbuzwa Andrea Pirlo
Ahavuye isanamu, Getty Images
Juventus yaraye igennye Andrea Pirlo nk'umutoza mushya usimbuye Maurizio Sarri wirukanwe.
Hari hashize icyumweru Pirlo, wahoze akina hagati muri iyi kipe, agizwe umutoza w'ikipe y'abari munsi y'imyaka 23.
Ejo ku wa gatandatu, Juventus yirukanye umutoza Maurizio Sarri wari umaze umwaka umwe gusa ayitoza.
Sarri yafashije iyi kipe kwegukana igikombe cya cyenda yikurikiranya cya shampiyona ya Serie A y'Ubutaliyani.
Ariko yasezerewe na Lyon yo mu Bufaransa mu mukino wa kimwe cy'umunani cya Champions League.
Ku wa gatanu mu mujyi wa Turin mu Butaliyani, Juve yatsinze Lyon ibitego 2 - 1, ariko Lyon ni yo yakomeje kubera gutsindira hanze.
Ku itariki 30 y'ukwa karindwi, Pirlo w'imyaka 41 y'amavuko nibwo yari yagizwe umutoza w'ikipe ya Juventus y'abari munsi y'imyaka 23.
Yashyize umukono kuri kontaro yo gutoza Juventus y'abakuru mu gihe cy'imyaka ibiri kugeza mu kwezi kwa gatandatu mu 2022.
Ahavuye isanamu, Getty Images
Juventus yavuze ko icyemezo cyo kumuzamura mu ntera "gishingiye ku kwemera ko Pirlo afite ubushobozi bucyenewe bwo kuyobora iyi kipe y'intyoza ikagera ku ntsinzi nshya, ahereye ku kuba yaratangiriye ku ntebe y'abasimbura".
Fabio Paratici, ukuriye imikino muri Juventus, yagize ati:
"Icyemezo cyo kugena Pirlo cyafashwe mu buryo bworoshye cyane, mu buryo tumenyereye muri Juventus, kuko ni umuntu wadukiniye, wakomeje buri gihe kuba hafi ya buri wese..."
"Tunizera ko yavukiye kugera ku bintu bikomeye. Yabigezeho akiri umukinnyi kandi dufite icyizere ko ashobora no kubikora nk'umutoza".
Hagati ya 2011 na 2015, Pirlo yakiniye Juventus imikino 164, yegukana ibikombe bine bya shampiyona ya Serie A.
Yayigezemo avuye muri AC Milan, aho yamaze igihe kinini cy'umupira we, ahatsindira ibikombe bibiri bya Champions League na bibiri bya Serie A.
Ahavuye isanamu, Getty Images
Pirlo yakiniye ikipe y'igihugu y'Ubutaliyani imikino 116, ayifasha gutsindira igikombe cy'isi cyo mu 2006.
Mu 2017 nibwo yasezeye ku gukina umupira, nyuma yo kumara imyaka ibiri akina muri shampiyona yo muri Amerika ya Major League Soccer mu ikipe ya New York City FC, amaze kuva muri Juventus.
Ubwo yagirwaga umutoza w'abari munsi y'imyaka 23 mu kwezi gushize, yavuze ko ashaka kunyura mu "nzira" imwe n'iya Pep Guardiola utoza Manchester City na Zinedine Zidane utoza Real Madrid.
Guardiola yatangiye atoza mu ikipe nto ya Barcelona, cyo kimwe na Zidane watangiriye mu ikipe nto muri Real Madrid, mbere yuko bombi batoza ikipe nkuru.
Icyo gihe mu kwezi gushize, Pirlo yagize ati: "Ariko ugomba kubiharanira, ukagira ubunararibonye".
"Inzira ntangiye ubu ni inzira nyayo kuri jye".
Umunyezamu Gianluigi Buffon w'imyaka 42, bakinanye muri Juventus no mu ikipe y'igihugu y'Ubutaliyani none akaba aje kumutoza, arusha umwaka umwe uyu mutoza we mushya.
Yanditse kuri Instagram ati: "Ubu rero ngomba kujya nkwita Bwana? Ishya n'ihirwe ku mutoza Pirlo".
Ahavuye isanamu, EPA
Sarri, Umutaliyani w'imyaka 61 y'amavuko, ku mpeshyi ishize ni bwo yari yahawe kontaro yo gutoza Juventus mu gihe cy'imyaka itatu, nyuma yo kumara umwaka atoza Chelsea.
Juventus yatsinzwe imikino itatu muri ine ya nyuma ya shampiyona, birangira ishoje irusha inota rimwe gusa Inter Milan yabaye iya kabiri.
Yanatsinzwe na Napoli ku mukino wa nyuma w'igikombe cy'Ubutaliyani kizwi nka 'Coppa Italia'. Hari nyuma yuko umupira w'amaguru w'Ubutaliyani wongeye gusubukurwa nyuma yo guhagarikwa kubera coronavirus.
Juventus yatwaye inshuro ebyiri igikombe cy'Uburayi (cyaje kwitwa Champions League), ariko ntirongera kugitwara kuva mu mwaka wa 1996.
Sarri wigeze kuba akora muri banki, yasimbuye ku butoza Massimiliano Allegri mu kwezi kwa gatandatu mu mwaka ushize wa 2019.
Itangazo ry'ikipe ya Juventus rishimira Sarri ku "kuba yaranditse ipaji nshya mu mateka ya Juventus" no kuba ubwe yarashoboye "kuzamuka ibyiciro byose by'umupira w'amaguru w'Ubutaliyani".
