Arturo Vidal yatumye Barcelona ikomeza kugira icyizere ku gikombe

Barcelona yaraye yigiye imbere, ubu irarushwa inota rimwe na Real Madrid ya mbere ku rutonde rw'agateganyo rwa shampiyona ya La Liga, nyuma yo gutsindira hamana Real Valladolid iwayo.

Arturo Vidal ni we watsinze icyo gitego kimwe rukumbi muri uwo mukino, ku mupira yari aherejwe na Lionel Messi.

Real Valladolid yari yabakiriye iwayo yabonye amahirwe yo kuba yakwishyura, ariko igenda iyapfusha ubusa ndetse n'umunyezamu Marc-André ter Stegen ayibera ibamba.

Real Madrid, ifite umukino itarakina, kuri uyu wa mbere irerekeza ku kibuga cya Granada ku mukino wayo ukurikiyeho.

Iyo Barcelona iza kuba yananiwe gutsinda, Real y'umutoza Zinedine Zidane yari kuba ifite amahirwe yo kwegukana igikombe kuri uwo mukino ukurikiyeho.

Uko ibintu bihagaze kugeza ubu, Real ifite amanota 80, ikaba irusha Barça inota rimwe ndetse inayirusha kwitwara neza mu mikino yabahuje.

Mu buryo butunguranye, umutoza Quique Setién ntabwo yashyize Luis Suárez ku rutonde rw'abakinnyi 11 yabanje mu kibuga, ahubwo aha amahirwe Riqui Puig w'imyaka 20 ukina hagati.

Kandi nubwo Barça yinjiye mu mukino neza ndetse ikawiharira, iyi kipe na kapiteni wayo Messi bagiye bakendera uko mukino wakomezaga.

Nubwo urebye Real Valladolid yatumye Messi atigaragaza muri uwo mukino, uyu Munya-Argentine w'imyaka 33 ntibyamubujije gutera indi ntambwe ikomeye.

Yabaye umukinnyi wa mbere muri shampiyona ya La Liga uhereje bagenzi be imipira 20 yavuyemo ibitego mu mwaka umwe w'imikino, kuva Xavi bakinanaga yabigeraho mu mwaka wa 2008 - 2009.