Anthony Joshua yatsinze Andy Ruiz Jr yisubiza imihigo y'isi mu cyiciro cy'abaremereye
Ahavuye isanamu, Getty Images
Anthony Joshua yavuze ko "yasabwe n'amarangamutima" nyuma yo gutsinda Andy Ruiz Jr akaba ku nshuro ya kabiri nimero ya mbere mu iteramakofe rw'abaremereye - akanavuga ko yiteguye "gusakirana" n'Umunya-Ukraine Oleksandr Usyk mu mezi atandatu ari imbere.
Joshua, Umwongereza w'imyaka 30 ufite inkomoko muri Nigeria, yarushije bigaragara Ruiz muri uwo mukino waraye ubereye muir Arabie Saoudite.
Yamwihimuyeho kuko uwo Munya-Mexique ufite n'ubwenegihugu bw'Amerika yari yamutsinze bitunguranye mu mukino wabaye mu kwezi kwa gatandatu uyu mwaka.
Joshua yabwiye BBC ati: "Ntabwo nashakaga gutwarwa n'intsinzi cyane ariko biteye gusabwa n'amarangamutima".
"Ndi umugabo wakoze amakosa kandi igihe nari ndi mu gihe cyo gutsindwa mu buzima, narakuze ndongera ngaruka mu buryo bwo gutsinda".
Muri uwo mukino wo ku munsi w'ejo, Joshua yari yahindutse mu mikinire, atandukanye n'uko yakinnye mu mukino wa mbere wabereye i New York.
Yinjiye mu rwego rumwe na Muhammad Ali, Lennox Lewis, Floyd Patterson na Wladimir Klitschko rw'abateramakofe baremereye bongeye kwisubiza umuhigo wo ku rwego rw'isi.
Nyuma y'uwo mukino, umuryango w'iteramakofe ku isi (WBO) wavuze ko agomba gukina n'Umunya-Ukraine Usyk mu gihe kitarenze iminsi 180 iri imbere.
Joshua yabwiye ikiganiro BBC Radio 5 Live ati: "Icyo nshoboye gukora cyose, nzagikora. Niba ibyo bivuze kurwana n'abandi barwanyi bo ku rwego rwo hejuru, ikizaba kizabe".
Yongeyeho ati: "Mujye ku rubuga [rwanyu] rwa Twitter rwa BBC Radio 5 Live mushyireho ubutumwa bwanyu muvuge uwo nkwiye gukurikizaho kurwana na we kuko niteguye icyo ari cyo cyose".
Ahavuye isanamu, Reuters
Kubrat Pulev, umuteramakofe wo muri Bulgaria ugenwa ngo ahatane w'ishyirahamwe mpuzamahanga ry'umukino w'iteramakofe (IBF), na we ari mu bazarwana na Joshua, ariko hazacyenerwa ko habaho amasezerano yuko habanza uwo Munya-Bulgaria cyangwa Usyk.
Usyk - winjiye mu cyiciro cy'abaremereye amaze gutwara imikandara ine yose yo ku rwego rw'abaremereye biringaniye - na we yari ku kibuga cya Diriyah Arena mu nkengero z'umurwa mukuru Riyadh ku munsi w'ejo areba uwo mukino.
Joshua yahara imikandara ye ya IBF na WBO aramutse atarwanye n'abo bategetswe ko arwana na bo, kandi Eddie Hearn ushinzwe ibikorwa byo kumwamamaza yavuze ko ibyo bidashobora kubaho.
Niba ari uko bimeze, bivuze ko mu gihe cya vuba aha yazakina na Deontay Wilder cyangwa Tyson Fury.
