Virgil van Dijk, Lionel Messi na Cristiano Ronaldo: ni nde 'mwami' wa ruhago i Burayi?

Impuzamashyirahamwe y'umupira w'amaguru i Burayi (UEFA) kuri uyu wa kane iratangaza umukinnyi wahize abandi ku mugabane w'Uburayi muri uyu mwaka.

Myugariro wa Liverpool Virgil van Dijk, Umuholandi w'imyaka 28, rutahizamu wa Juventus Cristiano Ronaldo, umunyaportugal w'imyaka 34, ndetse na rutahizamu Lionel Messi wa Barcelone, Umunya-Argentine w'imyaka 32, ni bo bari guhatanira icyo gihembo.

Mu mwaka ushize, Luka Modric wa Real Madrid ni we wacyegukanye, asoza igihe cyari gishize Ronaldo na Messi ari bo basimburanwa mu gutwara icyo gihembo.

Kuri iyi nshuro, Van Dijk araba yizeye ko ashobora gutuma abo bombi - Cristiano na Messi - bashobora kuviramo aho nanone, nyuma y'umwaka mwiza w'imikino wagiriye muri Liverpool yegukanye igikombe cya Champions cy'ubushize.

Kuva iki gihembo cya UEFA cyatangira mu mwaka wa 2011, Christiano amaze kucyegukana inshuro eshatu (2014, 2016, 2017), mu gihe Messi we yagitsindiye inshuro ebyiri (2011 na 2015).

Bombi bari mu bagihatanira uyu mwaka nyuma yo kwitwara neza mu mwaka ushize w'imikino.

Cristiano yafashije Juventus gutwara igkombe cya shampiyona ya Serie A, naho Messi afasha Barcelone kwegukana igikombe cya shampiyona ya La Liga.