'Nahoze mu igare ry’abamugaye none ndi muri Real Madrid' - Mendy
Ahavuye isanamu, Getty Images
Umukinnyi mushya Real Madrid yahaye amasezerano, Ferland Mendy, avuga ko yari yarabwiwe ko ashobora kutazongera gukina umupira ubwo yabagwaga inyonga y'itako afite imyaka 15 bigatuma agendera mu igare ry'abamugaye.
Uyu mukinnyi w'imyaka 24 ukina nka myigariro, mu cyumewru gishize yahawe amasezerano y'agaciro karenga miliyoni 47 z'amapawundi mu myaka itandatu muri Real Madrid, yari avuye muri Lyon.
Mendy ati: "Namaze igihe ngendera mu igare ry'abamugaye, namaze amezi hagati y'atandatu n'arindwi mu bitaro bamfasha kugira ngo nibura nzongere kubasha kugenda.
"Bari barambwiye ko ntazongera gukina umupira ukundi. Ariko dore ubu ndi muri Real Madrid".
Mu myaka ibiri gusa ishize, Mendy yakiniraga ikipe ya Le Havre mu kiciro cya kabiri mbere yo kujya muri Lyon mu kwa gatandatu 2017. Yahise anahamagarwa mu ikipe y'Ubufaransa akina umukino we wa mbere nayo mu kwa 11 bakina na Uruguay.
Mendy avuga ko bitangira atumvaga ko koko yageze muri Real Madrid. Ati: "Iyi ni ikipe ikomeye cyane, kuyijyamo ni ikintu gishimishije cyane. Ndishimye birenze kandi nizeye ko byose bizagenda neza".
Kugura abakinnyi muri iyi mpenshi bimaze gutwara Real Madrid miliyoni 300 z'amapawundi.
Mu bandi baguze harimo; rutahizamu w'umubiligi Eden Hazard wavuye muri Chelsea ku ashobora kurenga miliyoni 150 z'amapawundi na rutahizamu w'umunyaseribiya Luka Jovic wavuye mu Budage kuri miliyoni 53 z'amapawundi.
