FIFA itangaza ko Afurika y'epfo iri mu bihugu 9 bishaka kwakira igikombe cy'isi cy'abagore cya 2023
Ahavuye isanamu, Getty Images
Mu mubare utari warigeze ubaho mbere, ishyirahamwe ry'umupira w'amaguru ku isi, FIFA, ritangaza ko ibihugu icyenda byose hamwe byayibwiye ko bishaka kwakira imikino y'igikombe cy'isi cy'abagore cyo mu mwaka wa 2023.
Ibihugu bya Afurika y'epfo, Argentine, Australia, Bolivia, Brezili, Colombia, Ubuyapani na New Zealand byose byamaze gushyikiriza FIFA ubusabe bwabyo.
FIFA itangaza ko bishoboka ko n'ibihugu bya Koreya ya ruguru na Koreya y'epfo nabyo bishobora gusaba kwakirira hamwe iyo mikino.
FIFA itangaza ko buri shyirahamwe ry'umupira w'amaguru ku isi rifite igihe ntarengwa cy'itariki ya 16 y'ukwezi gutaha kwa kane ngo ribe ryayigejejeho ubusabe bwo kwakira iyo mikino y'igikombe cy'isi cy'abagore cyo mu mwaka wa 2023.
Itangazo rya FIFA rigira riti: "FIFA izakoresha uburyo bw'ijonjora bunogeye kandi bunyuze mu mucyo, buzaba burimo kugaragaza neza ubugenzuzi bwakozwe ndetse n'ubushake bufatika bw'igihe kirambye ndetse n'uburenganzira bwa muntu".
"Ibizava muri buri matora n'amajwi yatoye y'abanyamuryango b'akanama ka FIFA bizatangazwa ku mugaragaro".
Ubwongereza ni bwo buzakira irushanwa ry'umupira w'amaguru w'abagore ryo ku mugabane w'Uburayi rizaba mu mwaka wa 2021. Ni bwo bwonyine bwari bwasabye kuryakira.
Imikino y'igikombe cy'isi cy'abagore cy'uyu mwaka wa 2019 izabera mu Bufaransa hagati y'itariki ya 7 y'ukwezi kwa gatandatu n'iya 7 y'ukwezi kwa karindwi.
