Lionel Messi yongeye guhamagarwa mu ikipe y'Argentine, bwa mbere nyuma y'igikombe cy'isi cya 2018

Lionel Messi yongeye guhamagarwa mu ikipe y'igihugu y'Argentine, ku nshuro ya mbere nyuma y'imikino y'igikombe cy'isi cyo mu mwaka ushize wa 2018.

Uyu rutahizamu wa Barcelona n'uw'Argentine w'imyaka 31 y'amavuko, ntiyakinnye mu mikino itandatu ya gicuti Argentine yakinnye nyuma yo gusezererwa n'Ubufaransa mu kwezi kwa gatandatu k'umwaka ushize wa 2018.

Hari mu mikino ya kimwe cy'umunani y'igikombe cy'isi cyabereye mu Burusiya, Ubufaransa bukaza no kucyegukana.

Messi ni umwe mu bakinnyi 31 ikipe y'igihugu y'Argentine izakinisha mu mikino ya gicuti izayihuza na Venezuela na Maroc muri uku kwezi kwa gatatu.

Angel di Maria w'imyaka 31 y'amavuko, ukina hagati mu kibuga mu ikipe ya Paris Saint-Germain, na we yahamagawe bwa mbere muri iyi kipe nyuma y'imikino y'igikombe cy'isi cyo mu mwaka ushize.

Kuri uru rutonde rw'abakinnyi umutoza Lionel Scaloni yahamagaye, hariho bane bakina muri shampiyona ya Premier League yo mu Bwongereza.

Abo ni myugariro Nicolas Otamendi wa Manchester City, myugariro Juan Foyth wa Tottenham, Roberto Pereyra ukina hagati mu kibuga mu ikipe ya Watford na Manuel Lanzini ukina hagati mu kibuga mu ikipe ya West Ham.

Ariko Erik Lamela ukina ku ruhande mu ikipe ya Tottenham n'umunyezamu Paulo Gazzaniga na we ukina muri Tottenham, ntabwo bahamagawe muri iyo kipe.

Sergio Aguero ntiyahamagawe

Rutahizamu Mauro Icardi wa Inter Milan na we ntabwo yahamagawe, akaba atarongera gukina no muri iyi ikipe ya Inter Milan guhera ku itariki ya 9 y'ukwezi gushize kwa kabiri kubera ibibazo akomeje kugirana n'iyi kipe.

Rutahizamu Sergio Aguero wa Manchester City na rutahizamu Gonzalo Higuain wa Chelsea na bo ntibagaragara kuri urwo rutonde, bakaba baheruka gukinira Argentine mu mikino y'igikombe cy'isi cyo mu mwaka ushize.

Messi, kapiteni w'Argentine akaba ari na we umaze kuyitsindira ibitego byinshi kurusha abandi aho yatsinze ibitego 65 mu mikino 128 amaze kuyikinira, ku ikubitiro yari yasezeye ku gukinira ikipe y'igihugu.

Hari nyuma yo gutsindwa ku mukino wa nyuma na Chili mu gikombe cyo mu mugabane w'Amerika y'epfo cya Copa America mu kwezi kwa gatandatu mu mwaka wa 2016, mbere yuko yisubiraho ku cyemezo cye hashize igihe kitagera ku mezi abiri.

Messi wegukanye igihembo cya Ballon d'Or inshuro eshanu cy'umukinnyi wahize abandi mu mupira w'amaguru ku isi, igihembo kimwe cyonyine amaze guhesha ikipe y'igihugu cye ni umudari wa zahabu wo mu mikino ya Olympike yo mu mwaka wa 2008 yabereye i Beijing mu Bushinwa.

Ari kumwe n'ikipe y'igihugu y'Argentine, bamaze gutsindwa inshuro eshatu ku mukino wa nyuma wa Copa America ndetse batsinzwe n'Ubudage ku mukino wa nyuma w'igikombe cy'isi cyo mu mwaka wa 2014.

Biteganyijwe ko Argentine ikina na Venezuela ku itariki ya 23 y'uku kwezi kwa gatatu, bagakinira mu mujyi wa Madrid muri Espanye, mbere yuko bakina na Maroc ku itariki ya 26 y'uku kwezi kwa gatatu, bagakinira mu mujyi wa Tangier.

Imikino y'igikombe Copa America yo muri uyu mwaka wa 2019 iteganyijwe gutangira ku itariki ya 14 y'ukwezi kwa gatandatu kugeza ku itariki ya 7 y'ukwezi kwa karindwi muri Brezili.

Argentine iri mu itsinda B aho iri kumwe na Colombia, Paraguay na Qatar izakira imikino y'igikombe cy'isi cyo mu mwaka wa 2022.