Messi n'ikipe ya Argentina baba bari ku gitutu kirenze?

Niba harigeze habaho ifoto igaragaza igitutu cy'igihugu kiri ku ntugu z'umukinnyi, nta yindi itari iya rutahizamu Lionel Messi w'ikipe ya Argentina ahumirije yifashe ku gahanga mbere gato yuko umukino n'ikipe ya Croatia utangira.

Lionel Messi yikoreye umuba w'icyizere cy'abaturage ba Argentina babarirwa muri miliyoni 44 kandi byigaragaje ubwo we na bagenzi be bari batonze umurongo mu kibuga mbere gato yuko umukino utangira kuri uyu wa kane ubwo kapiteni Messi yari ahumirije ashyize ikiganza cye cy'iburyo ku gahanga.

Ni umukino Croatia yanyagiyemo Argentina ibitego 3-0.

Messi usanzwe unakinira ikipe ya Barcelona yarebye uko uwo basanzwe bahangana Cristiano Ronaldo yamaze gutsindira ikipe ye ya Portugal ibitego bine kugeza ubu muri iki gikombe cy'isi cya 2018 mu Burusiya, birimo bitatu yatsinze mu mukino n'ikipe ya Espanye.

Gutsindwa kwa Argentina mu mukino na Croatia kuri uyu wa kane, bivuze ko muri iri tsinda D, Argentina amahirwe yayo yo kuba yakomeza atakiri ayayo. Ashingiye ku kuntu indi mikino yo muri iri tsinda yaba yagenze.

None, kubera iki Messi nta musaruro yatanze? Yaba ari ku gitutu gituma agerageza gukora cyane birenze ubushobozi bwe? Yaba ari amakosa ye?

Hari amakuru muri iki cyumweru ko Messi yumvaga afite intege nkeya kubera kunganya 1-1 kwa Argentina na Iceland ku wa gatandatu ushize.

Ayo makuru yanavugaga ko yanze kwitabira gahunda y'ifunguro ryari ryateguwe n'abatoza b'ikipe ya Argentina, agahitamo gusigara wenyine mu cyumba cya hoteli acumbitsemo.

Niba kwifata ku gahanga kwa Messi ahumirije ku wa kane mbere gato y'umukino kwarashakaga kuvuga ko atari ameze neza muri we, byarahuhutse ubwo yabonaga umuzamu Willy Caballero wa Argentina usanzwe ukinira na Chelsea akora ikosa rikomeye.

Ikosa ryo kwihera umupira Ante Rebic agatsindira Croatia igitego cyayo cya mbere mu mukino waberaga ku kibuga cya Nizhny Novgorod.

Kuva mu mwaka wa 1958, bwari bwo bwa mbere ikipe ya Argentina yari itsinzwe cyane mu mikino yo mu matsinda y'igikombe cy'isi.

Ubwo yakoraga isesengura ry'umukino mu kiganiro cyanyuze kuri BBC One, Cesc Fabregas wahoze akinana na Messi mu ikipe ya Barcelona yavuze ko ikipe ya Argentina "yasenyutse" ndetse akemanga ugushyira hamwe kwabo nk'ikipe.

Yagize ati: "Bakinaga umwe ku giti cye. Ntabwo bakinaga bashyize hamwe".

Fabregas yongeyeho ati: "Biragoye kuri Messi. Nta bandi afite bo kumwunganira bakinana. Akeneye rwose abakinnyi nka Ever Banega cyangwa Giovani lo Celso".

Ati: "Akeneye umuntu umufasha kubaka umukino. Uba wifuza ko umukinnyi wawe w'imena aba afite umupira igihe kinini gishoboka".

Myugariro Pablo Zabaleta wahoze akinira Manchester City - wanakiniye Argentina mu gikombe cy'isi cya 2014 - we yavuze ko kuba Argentina yananiwe "gukina vuba vuba birushijeho" byatumye Messi asigara "ari we wenyine" imbere y'izamu, nta wundi afite bakinana.

Avuga ku ntsinzwi, Zabaleta yagize ati: "Sinshobora kwibuka ikindi gihe [Argentina] yigeze ikina kuriya. Ikipe yari imeze nabi cyane. Umukino wabo umuntu yahitaga awusoma kandi nta kintu bigeze bakina kigaragara".

Naho Alan Shearer wahoze ari kapiteni w'ikipe y'igihugu y'Ubwongereza, we yongeyeho ati: "Argentina nta gahunda yari ifite. Bari bari mu kavuyo".