Umutoza Ernesto Valverde yongereye kontaro yo gutoza Barcelona ho umwaka umwe

Umutoza Ernesto Valverde w'ikipe ya Barcelona yashyize umukono kuri kontaro yo gutoza iyi kipe mu gihe cy'inyongera kingana n'umwaka umwe.

Uyu Munya-Espanye w'imyaka 55 y'amavuko, afite n'amahitamo yuko ashobora kongeraho undi mwaka umwe - ibintu byatuma akomeza gutoza iyi kipe kugera mu mwaka w'imikino wa 2020-2021.

Valverde wahoze akina nka rutahizamu muri iyi kipe ya Barcelona, yasimbuye Luis Enrique mu kwezi kwa gatanu mu mwaka wa 2017, ayifasha gutwara igikombe cya shampiyona ya Espanye, La Liga, n'igikombe cy'umwami cya Copa del Rey mu mwaka we wa mbere w'imikino ayitoza.

Kuri ubu, Barça ni yo iyoboye urutonde rw'agateganyo rwa shampiyona n'amanota 51, ikaba irusha mucyeba Real Madrid iyigwa mu ntege amanota atandatu.

Byari byitezwe ko kontaro ya Valverde irangira mu mpera y'uyu mwaka w'imikino.

Amaze guhesha Barça intsinzi 65 mu mikino 96 amaze kuyitoza, anganyamo 22, atsindwa gusa imikino icyenda.