Barcelona na Real Madrid zigiye guhura gatatu mu gihe kitageze ku kwezi
Ahavuye isanamu, Getty Images
Ikipe ya Barcelona ifite iki gikombe izahura na Real Madrid mu mukino wa kimwe cya kabiri w'igikombe cy'umwami cya Copa del Rey.
Umukino wa mbere uzabera ku kibuga Nou Camp cya Barcelona ku itariki ya 6 y'uku kwezi kwa kabiri, naho uwo kwishyura ube ku itariki ya 27 y'uku kwezi.
Barcelona iri gushaka gutsindira iki gikombe mu mwaka wa gatanu yikurikiranya, mu gihe Real Madrid yo igiheruka mbere yuko Barcelona itangira kugitwara yikurikiranya.
Mu wundi mukino wa kimwe cya kabiri, Real Betis izakina na Valencia, mu gihe umukino wa nyuma w'iki gikombe uteganyijwe ku itariki ya 25 y'ukwezi kwa gatanu ku kibuga Estadio Benito Villamarin cy'ikipe ya Betis, kiri mu mujyi wa Séville.
Iyi tombola y'uko amakipe azahura yabaye ku wa gatanu, ivuze ko Barcelona na Real Madrid zigiye guhura gatatu mu gihe kitageze ku kwezi, kuko aya makipe azanakina undi mukino wa shampiyona yo muri iki gihugu izwi nka La Liga, ku itariki ya 2 y'ukwezi gutaha kwa gatatu.
Emilio Butragueno, umuyobozi wa Real Madrid, yagize ati: "Nta kintu na kimwe kimeze nkabyo. Aya ni amakipe abiri afite ubushobozi bwinshi, abakinnyi badasanzwe, kandi iteka tuba twiteguye kubona imikino irimo guhangana bikomeye".
Yongeyeho ati: "Twizeye abakinnyi bacu, ariko birumvikana uyu ni umwe mu mikino ikomeye cyane ku isi muri iki gihe".
Barcelona ni yo iyoboye urutonde rw'agateganyo rwa shampiyona, ikaba irusha amanota atanu Atletico Madrid iza ku mwanya wa kabiri, ikanarusha amanota 10 Real Madrid iza ku mwanya wa gatatu.
Mu mikino ya kimwe cya kane muri iki gikombe cya Copa del Rey, Barcelona yashoboye kwigaranzura Séville yari yayitsinze ibitego 2-0 mu mukino ubanza nuko iyisezerera iyitsinze ibitego byose hamwe 6-3. Real Madrid yo yanyagiye Girona ku giteranyo cy'ibitego 7-3 mu mikino yombi.
