Ibinugwanugwa mu mupira w'amaguru ku bakinyi ku wa Gatandatu

Umugwi Chelsea uriko urapfundika amasezerano yo kuzana umukinyi w'imbere wa AC Milan, Gonzalo Higuain w'imyaka 31 akinira Juventus ku mukopo, mu gihe umukinyi w'imbere Alvaro Morata w'imyaka 26 yitezwe kuja muri Milan ku mukopo. (Sun)

Hagataho, Milan igiye kwihweza ko yogurisha umunya Côte d'Ivoire Franck Kessie w'imyaka 22, arondegwa na Tottenham na Chelsea, ku miliyoni 45 z'ama euros. (Calciomercato)

Umugwi Sinobo Guoan wo mw'ihiganwa rikuru ryo mu Bushinwa "Chinese Super League", uriko urarondera guha akazi umukinyi wo hagati w'Ububiligi na Tottenham, Moussa Dembele w'imyaka 31. (Sky Sports)

Umukinyi wo hagati wa Barcelone Denis Suarez w'imyaka 24, ari hafi yo kwinjira mu mugwi Arsenal. Uwo mukinyi aturuka muri Espagne, vyavugwa mu minsi iheze ko yoba ariko aravugana na Everton na West Ham. (Sport - in Spanish)

Umumenyereza Unai Emery yipfuza ko Arsenal igumya Aaron Ramsey gushika mu mpera ry'ihiganwa, hakureka uwo mukinyi w'imyaka 28 arondegwa na Juventus ngo agenda muri kuno kwezi. (London Evening Standard)

Liverpool ntizoreka umukinyi wo hagati w'Ubwongereza Adam Lallana w'imyaka 30, ngo agende ku mukopo muri kuno kwezi kw'akadirisha ko guhererekana abakinyi. (Sky Sports)

Fenerbahce yahaye uwo mukinyi yahora muri Southampton amasezerano y'umukopo gushika mu mpera z'ihiganwa. (Fotomac, via Express)

Umukinyi wo hagati wa Paris St-Germain, Adrien Rabiot azoja mu mugwi Barcelone mu ci riza ku masezerano yikoranye. (Guardian)

Manchester City ntiyashoboye gufata umukinyi w'inyuma hagati wa Toulouse Jean-Clair Todibo w'imyaka 19, mu gihe uwo mufaransa asa n'uwuriko ararangiza amasezerano yo kuja muri Barcelona. (Independent)

Umukinyi w'inyuma wa West Ham, Reece Oxford w'imyaka 20, yoba agiye kuja muri Borussia Monchengladbach kuno kwezi, ariko ngo ashobora kurindira mu ci ngo avugane na Arsenal. (Mirror)

Umumenyereza wa West Ham, Manuel Pellegrini yarahakanye ibivugwa ko abakinyi b'imbere Andy Carroll na Marko Arnautovic, bose b'imyaka 29, bashobora kugenda muri kuno kwezi kwa mbere. (Sky Sports)

Hari amakuru yavuga ko Carroll ashobora gusubira mu mugwi yahoramwo wa Newcastle, bamugujije n'umukinyi wo hagati Jonjo Shelvey, 26. (Express)

Umukinyi w'imbere wa Aston Villa, Ross McCormack w'imyaka 32, ari hafi gusubira mu mugwi Motherwell ku mukopo. (Birmingham Mail)