Umupfasoni Yeo Moriba yagenywe ambasaderi w'umupira w'abigeme muri Guinée
Ahavuye isanamu, Getty Images
Ishirahamwe ry'umupira w'amaguru mu gihugu ca Guinée (Feguifoot) ryatoye mama wa Paul Pogba - akina hagati mu mugwi Manchester United - kuba ambasaderi y'umupira w'amaguru mu gisata c'abigeme.
Itogwa rya Yeo Moriba ryaje inyuma y'inama n'uwurongoye Feguifoot, Mamadou Antonio Souare.
Souare afise icizere ko Paul Pogba n'abo bavukana babiri b'amahasa, ko bazofasha mama wabo agakora neza ico gikorwa, mu gihe ishirahamwe ryipfuza gushikana umupira w'amaguru mu gisata c'abagore ku yindi ntambwe.
Moriba, yigeze gukina mu mugwi w'igihugu w'abakobwa, yavuze ko anezerejwe n'ayo mabanga mashasha.
Uwo mupfasoni yashize ubutumwa ku mbuga ya Feguifoot buvuga buti: "Ndishimye kuvyo ishirahamwe ry'umupira w'amaguru rya Guinée n'uwurirongoye bakoze."
Yeo Moriba yavyariye Florentin na Mathias mu gihugu ca Guinée, imbere yuko aja mu Bufaransa ahavukiye Paul.
Bakuru ba Paul Pogba bakina mu mugwi w'igihugu wa Guinée, Syli, mu gihe uwo mukinyi wo hagati muri Manchester United amaze gutsindira igikombe c'isi mu gisata ca U-20 n'ic'abakuze akinira umugwi w'Ubufaransa.
Umukinyi w'inyuma Florentin yahora akinira umugwi wo mu gihugu ca Turquie, Genclerbirligi, mu gihe umukinyi w'imbere, Mathias akinira umugwi Tours wo mu Bufaransa.
