Umutoza Clarence Seedorf wa Cameroon yahamagaye ikipe y'igihugu itarimo abakina mu Bushinwa
Ahavuye isanamu, Getty Images
Mu gutoranya abakinnyi b'ikipe y'igihugu ya Cameroon ya mbere kuva abonye aka kazi, umutoza Clarence Seedorf yirengagije abakinnyi bakina mu Bushinwa barimo na kapiteni Benjamin Moukandjo.
Usibye Moukandjo ukina mu ikipe ya Beijing Renhe, rutahizamu Christian Bassogog ukinira ikipe ya Henan Jianye yo mu Bushinwa na we ntiyahamagawe mu ikipe y'igihugu.
Aba bombi bari abakinnyi b'ingenzi bafashije Cameroon gutsindira igikombe cy'Afurika cy'ibihugu cyo mu mwaka wa 2017 cyabereye muri Gabon.
Umutoza Seedorf yagize ati:
"Abakinnyi beza bakiri bato ntabwo bajya guhatanira mu Bushinwa cyangwa ku mugabane w'Aziya."
"Abakinnyi bagomba kumenya ko niba bakurikiye kontaro zirimo amafaranga menshi kurushaho, baba baburijemo amahirwe yo gukinira ikipe y'igihugu."
Ariko yavuze ko ibi bitagamije gukumira abakinnyi runaka mu ikipe y'igihugu.
Yagize ati:
"Ntabwo turi kubuza umuntu uwo ari we wese gukinira ikipe y'igihugu. Icyo dushaka ni abakinnyi bafite ikinyabupfura kandi bakora cyane. Rero niba hari umukinnyi ukina mu burasirazuba bwo hagati akaba ashobora gutanga umusaruro mu ikipe y'igihugu, tuzamuzana."
Seedorf yavuze aya magambo ubwo yatangazaga urutonde rw'abakinnyi azifashisha mu mukino Cameroon izakina n'ibirwa bya Comores mu kwezi gutaha kwa cyenda.
Ni umukino w'amajonjora yo kwitabira imikino y'igikombe cy'Afurika cy'ibihugu yo mu mwaka utaha wa 2019.
Seedorf yongeyeho ati:
"Abakinnyi b'intyoza bakinira amakipe akomeye y'i Burayi ndetse bagakina mu marushanwa akomeye nka Champions League."
"Ducyeneye umusaruro mwiza ari nayo mpamvu dushaka kubaka ikipe ishoboye guhatana."
"Iyi ni intangiriro ariko turashaka gutangira kwiha imikorere igamije intsinzi ndetse dutoranya ikipe izakina uko tubyifuza."
