Umunyezamu El-Hadary wa Misiri, waciye agahigo k'umukinnyi mukuru mu myaka ukinnye mu gikombe cy'isi, yasezeye
Ahavuye isanamu, EPA
Umunyezamu Essam El-Hadary w'ikipe y'igihugu ya Misiri - kuri iyi mpeshyi waciye agahigo k'umukinnyi ufite imyaka myinshi y'amavuko ukinnye imikino y'igikombe cy'isi - yaseze ku gukinira iki gihugu.
El-Hadary w'imyaka 45 y'amavuko, yafashije Misiri gutwara igikombe cy'Afurika cy'ibihugu inshuro enye.
Yatangiye gukinira ikipe y'igihugu ya Misiri mu mwaka wa 1996. Asezeye amaze kuyikinira imikino 159.
Yakinnye mu mukino wa nyuma wo mu itsinda ubwo Misiri yakinaga n'Arabia Saudite mu gikombe cy'isi cy'uyu mwaka wa 2018 cyaberaga mu Burusiya.
Icyo gihe Misiri yatsinzwe 2-1 nubwo bwose yari yashoboye gukuramo penaliti.
El-Hadary yagize ati:
"Nyuma yo gukina imyaka 22, amezi ane n'iminsi 12, nasanze iki ari igihe cyiza kurusha ibindi cyo gusezera."
"Ntewe ishema cyane no kuba narakinnye mu ikipe y'igihugu mu mikino 159, nkagira uruhare mu kugera ku bikorwa bitari byarigeze bigerwaho mbere."
