Kuki ibitego byo mu minota y'inyongera byiyongereye ku kigero kitari bwabeho mu gikombe cy'isi?

15% by'ibitego bimaze gutsindwa kugeza ubu mu mikino y'igikombe cy'isi cy'uyu mwaka mu Burusiya byatsinzwe mu minota y'inyongera y'umukino. Impamvu isa nkaho ari uko imikino iri kugenda imara igihe kirekire, ariko se ni ukubera iki imikino imara iki gihe cyose?

Igitego cy'intsinzi Nacer Chadili yatsinze mu mukino Ububiligi bwakinaga n'Ubuyapani mu ijoro rwo ku wa mbere ntabwo kizibukwa mu mateka gusa nk'igitego cyagaruye mu mukino ikipe yari yatsinzwe ibitego 2-0, igatsinda umukino wo gukuranamo w'igikombe cy'isi bwa mbere kuva mu mwaka wa 1970.

Ahubwo icyo gitego kizanibukwa nk'igitego cyatumye igikombe cy'isi cyo mu Burusiya cyabaye mu mwaka wa 2018 kiba icyatsinzwemo ibitego byinshi mu gice cya kabiri mu minota y'inyongera kurusha ikindi gihe kigeze kubaho mu mateka.

Didier Drogba avuga ko umupira w'Afurika "wasubiye inyuma cyane"

Ibintu indwi vyakunzwe cane kuva mu ndwi ya mbere y'igikombe c'isi

Igikombe cy'isi 2018: Kuki abatoza b'abirabura badahabwa amahirwe?

Ubu bimaze kuba ibitego 21 bitsinzwe mu minota y'inyongera y'umukino.

Nkuko kompanyi y'ibarurisha-mibare Opta ibitangaza, uyu ni wo mubare munini cyane w'ibitego ubayeho mu mateka y'igikombe cy'isi. Ibindi byari byarigeze kubaho byinshi byari ibitego 12 byabonetse mu myaka ine ishize mu gikombe cy'isi cyaberaga muri Brezili.

None ibi biri guterwa n'iki?

Imibare itangwa n'ishyirahamwe ry'umupira w'amaguru ku isi FIFA, igaragaza ko biterwa n'igihe cy'iminota y'inyongera.

Mu gikombe cy'isi cyo mu Burusiya, impuzandengo y'igihe cy'inyongera gitangwa n'abasifuzi kubera igihe umukino wagiye uhagarara kigera hafi ku minota 6 n'igice mu mikino yo mu matsinda.

Hari n'imikino icyo gihe kinarenga.

Ubwo Koreya y'epfo yatsindaga Ubudage 2-0, byabaye mu gihe cy'iminota 9 cy'inyongera mu gice cya kabiri cy'umukino.

Mu gikombe cy'isi cyo mu mwaka wa 2010, impuzandengo y'iminota y'inyongera yari iminota 4 n'amasegonda 3. Naho mu mwaka wa 2014, icyo gihe cyari iminota 5 n'amasegonda 4.

Abasesenguzi baravuga ko ibi biterwa n'uburyo bukoresha videwo bwashyizweho bwo gufasha umusifuzi mu gihe hari aho agize urujijo mu mukino, nko ku makosa yakozwe cyangwa ibitego byatsinzwe ntibizugweho rumwe.

Ubu buryo bwatangiriye mu mikino y'igikombe cy'isi cya 2018 kiri kubera mu Burusiya. Benshi mu mpuguke mu mupira w'amaguru bemeza ko ubu buryo bugira uruhare mu minota y'inyongera yongerwa ku mukino.

Ariko mu kiganiro n'abanyamakuru mu cyumweru gishize i Moscow mu murwa mukuru w'Uburusiya, FIFA yatangaje imibare ivuga ko igihe cy'iminota y'inyongera kidaterwa gusa n'uburyo bwo gusifura bukoresha videwo.

FIFA yatangaje ko nubwo bwose uburyo bwo gusifura bukoresheje videwo bwatumye kuri buri mukino wo mu matsinda hatakara impuzandengo y'amasegonda 38, kwishimira ibitego nabyo byihariye iminota irenga 2 ndetse no gusimbuza nabyo bitwara igera ku minota 3 n'igice.

Bamwe banavuga ko igihe cy'ubushyuhe mu Burusiya nacyo cyabigizemo uruhare.

Ariko birumvikana ko atari buri gihe.

Ubushyuhe bwari ku gipimo cya dogere 17 i Moscow ubwo umukinnyi Aleksandr Golovin ukina hagati mu ikipe y'Uburusiya yatsindaga igitego ku munota wa 94 ku mupira w'umuterekano, ubwo batsindaga Arabia Saudite mu mukino utangiza irushanwa.

Ariko ubushyuhe bwari buri kuri dogere 32 ku kibuga cy'umupira w'amaguru cya Samara ubwo Edinson Cavani wa Uruguay yatsindaga igitego ku munota wa 90 w'umukino. Icyo gihe Uruguay yatsinze Uburusiya 3-0.

Mu buryo butangaje, mu gikombe cy'isi giheruka cyabereye muri Brezili, ho ahubwo habagaho n'igihe cy'ikiruhuko kugira ngo abakinnyi bagarure amafu kubera ubushyuhe bukabije bwari buhari - ibintu bitarabaho muri iki gikombe cy'isi cyo mu Burusiya.

Biranashoboka ko abakinnyi bari guhura n'ikizamini cyo kureba niba barakoze imyitozo ihagije, muri iki gikombe cy'isi aho amakipe menshi yahisemo gukina umukino wihuta cyane.

Mu by'ukuri, abakinnyi basa nkaho baba biruka cyane mu kibuga.

Mu gikombe cy'isi cyo mu mwaka wa 2014, Thomas Muller w'Ubudage ni we waciye agahigo ko kwiruka igihe kirekire kingana n'ibirometero 12 mu mikino 7.

Mu mikino y'igikombe cy'isi mu Burusiya uyu mwaka wa 2018, ako gahigo kamaze gukurwaho na Christian Eriksen wa Denmark, kuri ubu ufite impuzandengo y'ibirometero 13 amaze kwiruka mu mikino 4 amaze gukinira igihugu cye.

Impamvu ituma ibi bitego byo mu minota y'inyongera bibaho iyo yaba ari yo yose, ikigaragara ni uko muri iki gikombe cy'isi ibi bitego byo mu minota ya nyuma byatumye abafana baba bumva ko byose bigishoboka mu mukino kugeza ku ifirimbi ya nyuma.

Brezili yari ikeneye gutsinda ibitego 2 kugira ngo isezerere Costa Rica mu mukino wo mu matsinda.

Ubudage bwagerewe mu kebo bwajyaga bugereramo andi makipe.

Nyuma yo gutsinda Suwede ku munota wa 95 w'umukino ku ishoti rya Tony Kroos, nabwo bwatsinzwe na Mexico ibitego bibiri mu minota ya nyuma y'umukino, Mexico ihita ikomeza ityo nubwo mu wundi mukino yari yaratsinzwe na Suwede.

Ubwongereza bwatsindiye Tuniziya ku gitego cy'umutwe cya Harry Kane cyo ku munota wa 91 mu mikino yo mu matsinda.

Ariko Ubwongereza nabwo butsindwa igitego cyo kunganya na Colombia ku munota wa 93, cyatumye hongerwaho iminota 30 ndetse hakitabazwa na penaliti kugira ngo Ubwongereza bubashe gukomeza mu gice gikurikiyeho.

Nkuko iyi mikino yose ibigaragaza, ushobora guhaguruka mu minota y'inyongera y'umukino ugiye gato mu bwiherero, ukaza kugaruka usanga hari amateka yagucitse.